Mizoram sawrkarin consultant 4 nei mek

Mizoram sawrkarin
consultant 4 nei mek
Tunah hian Mizoram sawrkar chuan consultant pali a nei mek a. Thla khatah cheng sing thum chuang vek an hlawh bakah zin bill siamsak an ni.
Department of Personnel & Administrative Reforms record neih danin, tunah hian Mizoram sawrkarin consultant atan mi pali a ruat tawh a. School Education consultant atan Rev Dr K Thanzauva; Land Revenue & Settlement consultant atan C Chalsawithanga, MSS (Rtd); Home department-a CID (SB) consultant-ah Malsawma Royte, DSP (Rtd) leh Public Works Department consultant-ah Er Lalsangliana Chhakchhuak, E-in-C (Rtd) an ni.
Education consultant hian thla khatah Rs. 35000 a hlawh a, sawrkara secretary dinhmun pek a ni. LR&S consultant hian thla tin Rs. 32000 a hlawh a, joint secretary dinhmun pek a ni. CID(SB) consultant hian thla tin Rs. 30000 a hlawh a, sawrkar hna chelh lai dinhmun ang pek a ni loa, chutihlaiin sawrkar calendar year chhungin ni 8 chawlh phalsak a ni. PWD consultant hian thla tin Rs. 34000 a hlawh a, engineer -in- chief dinhmun ang pek a ni.
Heng consultant ho hian official thilah state chhunga sawrkar phalna in an zin phalsak a ni a. Transfer allowance hi sawrkara dinhmun pek an nih ang theuhin an bill thei a; DSP (Rtd) bik hi DSP tanglaiin a bill theih angin a bill thung ang. Sawrkar hna thilah lodging leh conveyance facility ho hman phalsak an ni bawk.