Mizoram school 1058-ah class pathum zirlaite endik
Mizoram school 1058-ah
class pathum zirlaite endik
School Education minister Dr Vanlalthlana chuan survey neihna school pakhat Rosebud School tlawhin, SCERT director Caroline Zoramthangi, School Education director Angela Zothanpuii leh DEO Aizawl R Lalbiakzauva ten an tawiawm. Minister hian a bial chhunga school dang pahnih a tlawh bawk.
PARAKH Rashtriya Sarvekshan 2024 hi Ministry of Education hian India ram pum huapa zirna in hma a sawn theihna atana hma a lakna pakhat niin, ram chhunga zirlaiten an thiam chhuah tura duan an zir chhuak em, tih enna tur a ni. National Education Policy 2020-in school stage hrang hrang – foundational, preparatory leh middle stage tawpna theuha zirlaiten thiam tura bituk an thiam leh thiam loh enna niin, language, mathematics, science, social Science-ah leh The World Around Us subject-ah naupangten zawhna an chhang a ni.
Ministry of Education duan danin zawhna hi PARAKH, NCERT-in state tina SCERT-te nen an siam a ni a, survey conduct hi CBSE kuta dah a ni. Mizorama survey neih hi district tina DIET principal-te leh district project officer-ten an district theuhah an buaipui a. He survey hi NEP 2020-in zirna atana a tum bulpui ngaihpawimawh a nih dan, zirnaa kan hnufualna, zirna huapzo kalpui a nih dan bakah education policy duangtuten quality education atana policy tha an duan theihna tura hriat tur pawimawh a hrin chhuah beisei a ni.
PARAKH hian national level observer atan IASE Mizoram principal Prof Lallianzuali Fanai a ruat a. Tehna chi hrang hrang hmangin Mizorama PRS 2024 hi felfai taka kalpui a ni em tih a enfiah a ni. National level observer hi SCERT joint director Dr Lalduhawmi Thomte leh DIET Aizawl principal H Lalfakzuala ten an tawiawm.
School pathum tlawhin, PARAKH-in tehna an duan hmangin heng school-a survey buaipuitu observer-te leh field investigator ten an hna an thawk tha em tihte, sample school-a zirtirtuten an school-a survey ti tura lokalte an dawngsawng tha em tihte, naupangten an zawhna chhan an entawn em tih bakah dik tak leh fel takin survey neih a ni em tih a endik a ni.