Mizoram Sports Conclave nei zo

Ni hnih awh infiamna lama India ram pum huap inrawnkhawm leh zirhona, Mizoram Sports Conclave 2024 chu Zirtawpni khan neih zawh a ni a. Conclave chhung hian 2036 Olympic Games-a Mizo infiammi tam thei ang ber tel theihnana ke pen dan tur sawi ho a ni.
Conclave-ah hian Meghalaya Sports minister Shakliar Warjri leh Assam Sports minister Nandita Garlosa te lokalin, 2036 Olympic hmathlira nei chunga theihna kawng hrang hrang an sawi a. An ni bakah hian India rama infiamna lama sulhnu lian tak nei – Reliance Foundation, Tata Trusts leh Jindal Group atangin an mithiamte leh mawhphurhna lian chelhtute an lo tel. Services Sports Control Board hotute, India rama sports federation leh association hrang hrang hruaitute, Indian Olympic Association hruaitute bakah ram chhung leh pawn atangin sports journalist leh infiammi langsar tak tak an tel bawk.
A ni hnihnaah hian 2036 Olympic thlir chunga hmasawn theihna tur thupui hrang hrang zirho a ni a. Meghalaya leh Assam Sports minister-te hian 2036 Olympics atana infiammite chherhriam tura hma an lak dan leh Mizorama tih ve theih nia an ngaihte an sawi.
Reliance Foundation, Tata Trusts leh Jindal Group aiawhten infiammite hmasawnna kawnga private sector-te tih tur an sawi a. Services Sports Control Board secretary CMDE Varun Singh leh South Korea tana Taekwondo-a Olympic medal la tawh Grand Master Prof. Hee do Kim ten an tawnhriat leh tul an tih an sawi a. Infiammite hlawhtlinnana chhungkua leh khawtlangin mawhphurhna a neih, sports ecosystem nung leh daihrei nei tura pawimawh sawiho zui a ni.
Indian Olympic Asociation, Indian Weightlifting Federation, Wrestling Federation of India, Boxing Federation of India, Table Tennis Federation of India hruaituten Olympian chherchhuak tura sports federation-te mawhphurhna an sawi a. Table Tennis national champion Monalisa Baruah Mehta leh Tata Steel Ltd. chief of sports Mukul Choudhari ten infiammite harsatna tawh thin laia support system neih that a pawimawh bakah Olympian chherchhuak tura chhungkua, sikul leh khawtlang pawimawhna an sawi a ni.
Mizoram atanga Olympian pahnih – C Lalremsanga (archery) leh Lalremsiami (hockey) ten an tawnhriat atangin Mizoram hmasawnna tura an ngaihpawimawh an sawi bawk.
Conclave kharnaah Sports & Youth Services minister Lalnghinglova Hmar chuan Mizoram leh India rama infiammite hmasawnna kawngah an thil huaihawt hian rah tha a chhuah ngei a beisei hle tih a sawi a. Thu hrang hrang an zirho piahlamah, sport association-te leh mikhual lokalten remchangah la a, hmalak hona hun remchang atana hma an la chu lawmawm a tih thu a sawi a ni.