Mizoram sum hmuhna ‘Others’

Mizoram sawrkar hnuaia department hrang hrang website-te hi tlawh manhla tak tak an awm laiin, tlawh manhla lem lo tak tak pawh an awm nual.
Taxation department website hi tlawh manhla zingah a rin luh theih ang. Chutih rualin, mipui tana hriat chakawm, tarlan harsa lo tak tura ngaih ni si, mahse website-a tarlan tak lohte pawh a awm thei awm e. Chung zingah chuan Monthly/Annual Achievement-a tax hrang hrang hmuh dan tarlannaah ‘Others’ tih tawp hi a awm a. Others chuan a huam zau thei hle ang tih a rinawm a, source-te tarlan sen vek pawh a ni kher lovang; mahse, source lian zual pali/panga han tarlan chu thil harsa lo tura ngaih a ni.
Kum 2025-26 chhunga monthly collection-a Others column-ah April & July a awl (blank) a; tin, sum luh dan pawh a inthlau thei hle. Entirnan, May thlaah Rs 13,880 a luh laiin, June thlaah Rs 7990; July-ah a lut lo a, August-ah Rs 25,850; September-ah Rs 10,150; October-ah Rs 16,590. November atang chuan a indawt danin- 2020; 3370; 2600; 9390; 8500, tih te a ni.
Entertainment Tax luh dan pawh hi mipui tan chuan hriatthiam a harsa deuh maithei. Entertainment Tax hi thla tin a lut lova, a luh chuan thla khatah Rs 10,000 deuh zel a ni a, chutiang chuan thlaruk chhung thla tin Rs 10,000 a lut a, 2025 financial year kum tawp March-ah Rs 20,000 a lut ve thung. Entertainment tax hi khawi atanga lut thin nge tih a hriat loh a, a luh chang pawhin Rs 10,000 a ni leh tawp a; thil mak ang reng tak chu a ni.
Mizoram sum hmuhna (state’s own tax) hnar lian ber GST luh dan pawh hi a inthlau thei hle a, thla khatah a changin cheng vaibelchhe 100 chuang te a luh laiin a chang chuan cheng vaibelchhe 63 chuang te a lut a. GST hmuhna hi chu sumdawnna thil a nih avangin eng emaw bungraw tangkhang avang te pawhin a danglam duai duai thei ang tih a rin theih. Chutih rual erawh chuan, GST pe tura ngaih pe lova lo awm mai maite pawh a awm theih ang tih a rinawm. Mizoram sum hmuhna lian ve ber GST-ah hian ngawrh lehzuala a kaihhnawih department ten tan an lak a pawimawh hle tih a lang awm e. Tin, chutih rualin, sum hmuhna ‘Others’ hnuaia source hrang hrangte hi awmze nei zawka kalpui (manage) a pawimawh dawn hle tih a lang bawk.