Mizoram Super League bihchianna
MSL Season X (March ni 11, 2025)
Kum 1990 chho khan Aizawl thalai basketball khel thin zingah ‘Chempui Court’ tih a lar thei hle – chu hmun chu Electric veng, PL High School kawt sawina a ni a, chempui ang maia zuih tat basketball court te tak te a ni.
Chuta inkhel thin Electric veng rawltharte chuan an thiam leh theih ang angin basketball team an din a – Turbo Kings, Zion Shoppers leh God’s Garbage team-te kha an veng Electric rawlthar rual phuarkhawmtu an ni thin – kha’ng hun lai hre pha kha chuan he’ng club hming ka’n lam chhuak thar leh hi an lungleng ngawt ang.
Football leh volleyball boruakin an veng a tuam zui a, inkhelhna mual nei si lovah chuan an chetthat chhanchinin chanchinbu tlang a luah fo.
Basketball thawm dai tawh tak chu mi thahnemngai leh inpe, an veng pa Rotluanga’n kum 2015 khan mahni senso liau liauin phumbo tawh basketball boruak chu a kaitho leh a, kum 10 a ral meuh chuan MSL-ah an invawrh kai der – welcome to MSL X.
Electric BC neitupa leh an player ni bawk Rotluanga chuan, “Ka mimal nun min kaihruaitu (motto) chu ‘rinnaa kal’ tih hi a ni. He thu hi a dik leh fuhzia ka tawng fo. Tun tum MSL X-a main sponsor kan hmuh hunte hi inchinfel theih tawp ber ni (last day) a ni a, Pathian hnathawh hi a makin a hlu,” tih The Aizawl Post (Hoops Mania) a hrilh.
Electric BC tana sum thehchhuaktu lian ber (main sponsor) hi Triumph, Aizawl a ni. Mizo thalaite tana an neih thehchhuak thinte hi an va hlu em.
Hoops Mania thlirna
MSL boruak intham chho alh leh so hulh hulh karah hian, fur laia kawlphetha (electric supply) a tha fumfe lo leh a chuai ruih thin ang deuhin Electric khawtlang hi an dula an dai dawn riaua a lan laiin, an hnam dang player rawn thleng thawm leh club jersey tlangzarh thawm a rik dun meuh chuan an ri a ring a – an eng ta!
An head coach C. Vanengmawia, Zotlang hi Mizoram basketball thawmin ri a chhuahna khawiah pawh inhmelhriattir chawp ngai tawh lo a ni.
Coach angin MZU team leh Mizoram Junior team lamah sulhnu lo nei tawhin, Zarkawt BCA-ah leh club dangahte pawh lo khel tawh a ni a, MSL huangah pawh hniak a lo hnutchhiah chiar ve dup tawh. MSL-ah erawh coach ang chuan a tumkhat inlanna tur a ni nang a, hnam dang player enkawl thiam bik tura ngaih a ni.
“Club owner Rotluanga hi ka laichin hnai a ni a; tin, Electric veng hi ka pa lu nghahna hmun leh kan inpui awmna a ni a, he’ngte avang hian theihtawp ka chhuah ang. Ka player-te lakah rinna ka nghat ngam,” tih thu a sawi. Assistant coach palian chum buang Andrew-a, Republic hi Khatla TBL vul vanglaia innghahna tham kha a ni thin a, a thluak a tangkai ang.
MSL lo khel tawh deuh vek player an kawl ther fur thei bawk – tawnhriat ngah RVLA hi Chawnpui leh Vikings-ah lo khel tawh thinin Rookie of the year pawh a lo dawng tawh nghe nghe – en bik tham a ni ang.
Vikings leh Mission Veng Hotshots tana lo inlan tawh, Isle-a hi ngaihthah a thiang bik lo bawk ang.
Kulikawn tlangval Mawia, Tuikual North tlangval Mala, Chaltang atangin Jonathan-a leh Zohminga bakah hian Electric baller Lalhmangaihzualate hi player chhiaa sawi an ni ngai lo, an tawnhriat hmangtangkai chhuak thei tak ang maw?
Mizoram Super League bihchianna MSL Season X (March ni 11, 2025)
Get real time updates directly on you device, subscribe now.
Prev Post
Next Post