Mizoram Super League X Champhai Week

A tumkhatna atana MSL Aizawl pawna khelh hmasak ber, hun chhinchhiah tlak tak chu March ni 18, 2025 zan dar 7 khan Vanlallawma Indoor Stadium (VANIS)-ah khelh a ni. A hmuna entu stadium chhunga mipui khat vek zauthau so hulh hulh karah ‘Champhai Week’ khuhhawnna tawi fel taka neih a ni.
A thlengtu lam CDBBA President Pu R. Lalbiakzuala (Mapuia) leh MBBA President Pu R. Lalnunpuia’n inkhel entute hmaah inhmelhriattirna tawi leh mipuite chibai bukna an neih zawh rualin semi-final luh beiseiawm a thlengtu, Champhai BC leh champion ngei tum, hneh loh la nei lo, Khatla TBL-te’n Champhai Week opening match an khel zui nghal.
Inkhel bihchianna
1st quarter-ah Khatla TBL in 18-17 in hma an hruai a, inkhel a rei tial tial a, an inkar a zau tual tual a, hun a tawp meuh chuan tawnhriat nei tha zawk Khatla TBL in 76-61 in Champhai BC lakah hnehna an chang.
Champhai coach Mapuia Zote in a player-te hun tir lamah a remkhawm fuh – inkhel a rei a, hun tam zawk a lo hrual tawh a Mizo player-te laka rinna a nghah ngam tawk loh a lang a, inkhel live telecast duhthusam lo tang chut chut karah pawh a thutlukna fuh tawk lo a lang fiah fo!
Khatla TBL in an game ngai rang tak rawn lantir lehin, an head coach H. Laldinsanga thachhangdawltu, Simon Hangsing hovin an rawn pen chhuak – an Asst. coach in a Mizo player a ring tawk a, hei hi a fuh zui.
|awiawmtu nei tha Champhai BC lam an phur a, an player tha ber DC Franklin (24 pts) erawh a phur sual! A 3 pts. vawi 18 thehchhuahah tum 5 chiah a lut a – 27% lek! A teammate-te tan hun tha siam saktu ni lovin lansarh a khel ta emaw tih theih tur hial a ni!
Heng karah hian Mayor’s Cup lama MVP Ropuia (14 pts) khelh ropui zan a ni bik lova, a theihna lan chhuah tir turin hun tha a neih te a chhawr thiam a ngai.
Zara’n beisei a pha tawk lo va, Jona-a leh Rindika hian minute chang tam se – inkhel boruak a dan phah ang em? Heng karah hian Sangliana (12 pts) khelh that zan a inherchhuak – club tam tak it rawn leh chiltiputtu a ni nghal dawn chiang!
Mikhual Khatla TBL hian ‘Emmanuel-a an zingah a awm’ tih an hria a, an khel a dam dup!
MDL X match 4-na an khelh zan hian player langsar fal, Emmanuel-a (27 pts) hi a teammate-te’n an chawm tha hle.
Captain |hazuala’n (13 pts) a kut kal zan (hot hands) hmangtu Emmanuel-a hun tha a pe thiam a, tul lo taka mimal lansarh khelh tum an neih ve loh an chhawr.
An star player James (8 pts) leh a defense tha hmuh hmaih theih loh Yadwinder Singh (5 pts) te hi khelh dan tur awmze nei hrilh an ni tih a chiang!
Tualchhung tlangval Thianga (11 pts) hi khelh chhiat em em nei lo a ni a, Dede-a (2 pts) hian minute chang tam se, round sanga mamawh a nat zual hunah inrintawkna a tlachham lovang.
Commentator Ahruaia hruaina hnuaiah
Basketball hi dan neuh neuh, a technical terms a sawi ngai – Mizo tawnga sawi hlei theih loh a tam a, heng hrethiam lo tan hi chuan inkhel hneawm leh ninawm a ni thuai thei!
Chutih rualin, Mission Veng tlangval Ahruaia commentary-na hnuaiah he’ng thu harsa leh khirhte hi sawi fiahna nen inkhel chhimtu tan ani hian chhawpchhuakin a rawn buatsaih thin a, hei hian MSL X inkhel en a ti nuam thei hle.
MBBA leh CDBBA thawhhona tha
Pawl leh thawhhonaah hian khawi lai emaw pir chhuaha fak leh sel chiam hi kan thil sawi hlimthla tarlangtu leh tifiahtu atan a hrisel ber kher lo fo!
Aizawl pawna inelna buatsaih hi ‘risk’ a sang a, sum luangchhuak a tam phah a, hahna tur hna a thuahhnih; mahse, thawhhona a that chuan mimal leh pawl chu insengso bawk mah se, a hlawk tlat!
Inelna buatsaihtu MBBA puipa lam hian sel leh rel khal tak tak tawk thin mah se mimal anga hlawkna sum pakhatmah beisei lo va an inpekna leh an thawhrimna hi zah leh fak an phu e.
Thlawptu tha khualchhawn thiam CDBBA lam pawhin Silver Jubilee duhthusam an hmang – thawhhona rah tha vang vek a ni e.