Mizoram Super League X MSL X thununtu Khatla TBL!

Mizoram Super League X
MSL X thununtu Khatla TBL!
Sharda University Mizoram Super League chu zanin hian league round khelh zawh a ni dawn. April ni 1 zana inkhel result avangin semi final lut tur leh relegation inelna hmachawn tur a hriat ta; MSL X hi Khatla TBL in league round an thunun a, club pasarih te an hneh vek – hneh loh an tawng lo! Mizo basketball ‘legend’ tia koh ngam leh phu, TBL head coach H. Laldinsanga (Mapuia) hovin champion ngei an tum chhunzawm ang.
April ni 1 zan hian inkhel match hnih a awm a, Chanmari BC in 83 – 77 in Champhai BC an hneh a, MSL X semi final luh tum Saron BC erawh Khatla TBL in 91 – 78 a hnehin, fans nei tha Saron par an thliak!
He inkhel pahnih result avang hian Zarkawt BCA leh Zemabawk BC te chuan semi final an lut zui ta daih bawk. Chutih rualin, nizan lamah Zemabawk BC in Zarkawt BCA an hneh chuan semi final-ah Chanmari BC an tum thei dawn a, an chak loh erawh chuan Khatla TBL an hmachhawn a ngai thung ang.
Zarkawt BCA tan pawh semi final-ah Zemabawk BC an hneh chuan – Chanmari BC, an chak loh chuan Khatla TBL an nuai a ngai dawn. Team ?ha pali hi inhneh kual tawn thei vek an ni a, semi final chin hi chu R. Dengthuama Indoor Stadium lamah ngei chhim a fuh tawh ang.
Chanmari BC Vs Champhai BC
Inkhel hmasa zawkah a chak zawk tan semi final kawngkapui a in hawng a, mi dang inkhel ngaichang miah lovin he club pahnih hi an inhmachhawn a, inkhel hmuhnawm bik a ni.
Chanmari BC tan GD Magee a hriam hle, point 43 lawih a nei – team pum score belhbawm aia point a neih tam zan hian Kanan tlangval Nuna (12 pts/Player of the match) leh Big Mike (10 pts) ten an thlawp tha hle.
He team hi mimalah an innghat lian hle tih theih a ni a, inhliam palh leh chhan dang vanga an top three player te hian semi final an khelh loh palh a hlauhawm zual ta viau!
An coach Nuna leh Reuben-a hian inkhel awmze awm lova anni pathum hi awmze nei taka an hahdam tir a nih pawhin an demawm lovang!
Champhai BC hi an khelh fuh tuma semi final lut tur chiang sa theihna nei an ni a, thutlukna siam fuh tawk lo an nei fo – an coach Mapuia Zote hian hun tawp second 40 chho va a nau te khelh danah khan siam that tur a hmu ang.
Samuel-a (18 pts) khelh that zan hian inkhel hmuhnawm an rawn lan tir a; DC Franklin (17 pts), H. Tomar (14 pts), K. Dinga (14 pts) leh Ropuia (12 pts) te hian semi final khelh theihna remchang bawhpelh mah se, relegation battle lamah erawh MSL XI a inlan leh tur khawpin insiam that an tum ang – Aizawl khawpui ta bik MSL hi a nih loh zia tilang turin thutlukna siam kawngah fimkhur ngai ber team zinga mi an ni.
Saron par thliaktu Khatla TBL!
Inkhel a hmuna tawiawmtu ?ha ber Saron BC in chak an tum – an tum bur!
Khatla TBL chakna chhu chat theitu tur ber Saron BC coach Lana hovin tawiawmtu mipui nen Saron BC hian theihtawp chhuahin an tualchhung tlangval Mizo player-te tang thei viau mah se, an foreign player Elomni (20 pts) in a hna a hai a, hun pawimawhah a che sual reng – a soft!
T. Lalhriatzela, Tea (24 pts) erawh player ?ha huangah sawi loh ngam a ni ta lo – khel tha dap dup zel hek le. A. Tyagi (16 pts) a tang thei viau a, Ramdinfela Pachuau (11 pts) bakah tualchhung tlangvalte thawhhona kha hahipa sawi zui tham a ni – Saron BC Mizo player-te hi tawnhriat nei tawk lo mah se, player hmasawn ber zinga mi an ni.
Khatla TBL tan an player pawimawh Thianga tel lo pawhin an captain |hazuala (24 pts/ Player of the match) hovin James (26 pts) leh Emmanuel-a (15 pts) ten champion tum zia an chhuah chhunzawm zel a, Lsa (10 pts) hian player satliah a nih loh zia a rawn tarlang nawn leh bawk.
Khatla TBL hmel thar leh danglam tha zawka rawn phochhuaktu an coach Mapuia ho hian league round a an ke chheh ang hi an rawn lantir zui a nih chuan, MSL X nomawi chu ‘Khatla pheiah…’ a ni mai.