Mizoram Super League X Rintlak Rina Renthlei leh rinngam Rinchhanate zan…

Mizoram Super League X
Rintlak Rina Renthlei leh rinngam Rinchhanate zan…
Sharda University Mizoram Super League round 5-na khelh chhunzawm zel niin, March ni 27, Ningani zan khan MSL X-a thawm reh rih, rintlak Rina Renthlei, MSL league MVP tum 3 ni tawh leh Zotlang tlangval rinngam Rinchhanate’n an team-te chakpuiin, player of the match an hlawhchhuak ve ve.
Zemabawk BC vs Electric BC
Inkhel hmasa zawkah an MSL khelh hmasa bera MSL X nomawi chawi sawi ri ngam Zemabawk BC tan hna hautak awm lovin Electric BC lakah 82-72 in hnehna an chang.
Zotlang tlangval Rinchhanan point 24 neiin, player of the match-ah a phu ang ngeiin thlan a ni. Perkins Jr. erawh a fimkhur tawk lo va, hnawhchhuah (eject) a ni.
N. Beniwal leh captain Rozamate’n point 12 ve ve an nei bawk. An coach Sangpuia tan a player-te khelh that tawk lovah siamrem ngai chinfel tur a awm ang.
Electric BC coach V-a tan player lakluh kawnga harsatna an neih avangin chhuanlam hrawl tak awm mah se, a tawp thlenga tha thlah lova tan erawh a tum. Zonunsanga point 25 lai neih zan hian Mawia (12 pts) leh Ruata (10 pts) bakah player hman rim A.S Sarath (14 pts) erawh hnehna channa’n a tawk zo lo. An palian Ruatpuia hi chakpui tham theihna kawltu ni mah se a fitness a tha tawk lovin a lang!
Bungkawn LB vs Zarkawt BCA
Lei rem rap hlei thei lo LB tan BCA an lian hret a, 71-100 laiin Bungkawn LB lam hian MSL X zin kawng bumboh an zawh mekah hian an tlawm a tul!
LB tan JS Sylver (21 pts) a reh hle a, hun a chan chhuna thawm nei hak Remruata(12 pts) a chetha thawkhat. Zorempuia (11 pts) leh player dangin point an thawkchhuak tam tawk lova, an tlawm a tul!
A tawpa BCA nena an inthlauhna hi sang deuh mah se BCA lam tan hian hna hautak an siam nual!
Zarkawt BCA lam hi an khel tha tual tual thung a, MSL X-ah point 100 tum 2 nei hmasa ber an ni.
Player of the match Lalrina Renthleiin a theihna sawrchhuak turin a hun tha neih a bawhpelh duh lo a, point 14, reb. 7, rsst. 6 leh steal 1-te hi minute 23 lek chhungin a ngah hman!
MVP ni lai R-a pawhin minute 25 chhungin point 14 a nei hman a, Cunningham (29 pts) erawhin a thiante ball pek mai tur a keng rei thinin a lang, mimal stats. aiin team game pawimawhzia a hriat a tul – player chawkphur thiam bik an coach Marc Tetea Sailo hian a player-te tan squad tikimtu satliah an nih lohzia phochhuahna’n inkhelh hun a pe vek a, hei hian inrintawkna team chhungah a siam ang.
Hoops Mania Time Out
Mizo basketball star tih ngam sak turte an upa chho ve zel a, an hniak rawn chhui zui thei tur naupang chherna hi MBBA lam pawhin a ngaihluin naupangte a lo hrual tawh thin. Hetih rual hian mimal thahnemngaiin naupangte tan hun leh hmun buatsaihin, basketball zirna academy-te hial din an awm bawk. Changtlung takin Dennis Basketball Academy, Khatla South, Aizawlah siam a ni a, chumi lam chu i thlir zuai ang u.
He academy buaisaihtu Pu Dennis-a hian, “Mizoram tana khelh ve hi kan veng thalai, Khatla South-a chengte tan ka chak ve em em a, kan trial ve fo va, kan tling lo reng mai a, selection-ahte chuan han tling ve thin mah ila, a koh loh pawlah kan tel leh thin!
“Ngaihtuahna thar neiin, academy dinin hma ka la ta rawih a; veng dang naupang basketball an rawn thiam chho tan tih ka hmu tel a, rual ka awt zual sauh a, Dennis Basketball Academy (DBA) hi kum 2008 atang khan ka kalpui tan ve a ta a ni.
“Naupang 5 neiin ball hi ka pawisa khawlte’n ka lei sak ve fo va, rethei takin kan kalpui ve bauh bauh a, kum 2016-ah khan Rataract hoin U-16 inter veng tournament an siam a, ka chhuahpui hmasak ber a ni a, final-ah 3 points-in kan chak lo zui!
“Ka la na ve khawp mai a, mahse, a aia nasain kan tang leh sauh a, St. Joseph school lamah coach ka ni zui ta bawk a, lekhazir leh basketball hi a kalkawp thei tih lantir ka tum ve nasa a; ka academy naupang tha zual deuhte St. Joseph-ah basketball khel turin sports concession-in ka luhtir hial a ni.
“Kan thalaite ruihhlo lamah an tlan nasa tih ka hmuh hian basketball hi zirtir ila an tlan phah lo deuh ang tiin ngaihtuahna ka seng tel leh a; Bible chang zir tur ka pe a, tuk tin zingah coaching-ah ka zawt leh thin. Heng ka tihte hi Pathianin mal a sawm a ni ngei ang, sualna lam hawi han sawi zui vak tur hi ka hre tlem hle mai.
“Basketball + lekha zir + discipline-te hi ka motto ve a nia, ka sawi rual tir thin bawk.
“Ka zirtir chhuah hi a then hna lamah army, police-ahte leh MSL lamahte an chanchin ka hriat zui hian ka lawm ve thin,” tiin inthlahrung takin The Aizawl Post Hoops Mania a hrilh.
MSL X chhung hian ani anga naupang nun kawng duk kawhhmuha hma lo la thinte hi rawn zeh tel thin kan tum e..