Mizoram Super League X Zemabawk BC an tlo!

March ni 21, Ningani zan khan MSL kai thar zinga club hriam leh tlo ber, Zemabawk BC-in tun MSL X-a inhnehna ssng ber dawttu (point 28 zetin) Bungkawn LB chu 91-63 laiin inkhel tan tirh phat atanga game thununin harsatna awm lovin an hneh!
Champhaia R. Vanlallawma Indoor Stadium (VANIS)-ah entu mipui tan dunk, killer pass leh tun dinhmuna inter state player hot ber, Delhi tlangval Nitish Deniwal (11 pts) game fing chungchuang tak phochhuahin a awm zui a, inkhel level a sang takzet.
Inkhel bihchianna
Inkhel tanna ball referee-in a vawrhkan ruala kan hmuh chu team pahnihte Mizo player fitness tha leh za tak bakah, Bungkawn LB coach, Armed Veng pa Dave-a’n match hmasa pahniha inrintawkna a hloh emaw tih mai tur, a foreign player JS Sylver (39 pts) phur leh inringtawk taka a rawn chhuah thar ta tlat kha a ni!
A player 12-te chunga rinna nghattu Dave-a erawh a bikin LB Mizo player lamin an pu laka an bat an chhanglet hlei thei lo va, points 10 nei pha an awm lo!
Minute 40 chhungin point 63 chiah team-in an neih an tuar a, MSL X-ah beisei an pha lo chhunzawm zel. Remruata (4 pts) hi tawnhriat nei tha a ni a, Reuben (3 pts) lah player chhiaa sawi a ni ngai lo – team tan thahrui ni tura anni pahnih hi an insanphek a ngai.
Faka (5 pts) hi Mizo player zinga point nei hnem ber a ni a, ani hi khel chhe hran lo mah se team mamawh chu point neih belh a ni tlat – match thum a zawna chak loh hi inenfiahna’n hmang se!
Tun dinhmuna point guard hot ber, Kanan tlangval Rozama (16 pts) hian a khel a lansarh loh zanah pawh a hna a tlin. Zemabawk BC hi MSL X club zinga hnam dang lakluh kawnga bazar fuh ber tia chhal ngam an ni.
An coach Sangpuia hi tawnhriat nei tam tawh a ni nang a, heti taka a hnam dang player pahnih Perkins Jr. (33 pts) leh N. Beniwal (11 pts)-te a chher thei hi a beisei piah lam a ni.
Zotlang tlangval Rinchhana (10 pts) hian 2 pts field goal 5/5 a nei a, Mizo player dangte pawhin kan sawi tawh thin team game an rawn lantir thin a, statistics lam atanga zirchian pawhin player mahni hmasial (selfish) an awm lo.
Bungawn LB an hneh zan hian Zemabawk BC player-te an inlan vek. He team-ah hian hahchawlhtir ngam loh leh khelhtir ngam loh an awm lo!
Aizawlah rawn let se Zemabawk BC hian tan rawn an hlawh zui ang – Mizo mipui ngainat team game tarlang thintu ni miau hek le!
Match thum an khelh atangin Khatla TBL point hniha an hneh loh bak kha chu an la chak ve ve.