Belgium barakhaihtu Ukraine!
Ningani Nations League playoff first leg match dangah indonain a la kiansan theih lo Ukraine chuan si phur hmasa zet chungin Belgium lakah comeback ropui an lantir a, Spain ram khawpui pakhat Murcia-a an mikhualte lakah 3-1 hnehna an sualchhuak thei.
An ram a buai avangin Ukraine hian mi ram daihah home match an khelh a la ngai chhunzawm zel rih a; team lian Belgium laka hnehna an chan theih avangin Nations League top tier-a kai chho thei turin dinhmun tha takah an ding zui.
Inkhel danga Scotland leh Turkey pawh an chak zan hian Ukraine lamin si an phur hmasa a, captain Romelu Lukaku chuan minute 40 pelhah Kevin De Bruyne free kick atanga goal hmahruai thunin, coach thar Rudi Garcia hnuaia an match hmasaberah Belgium an chefuh dawnin a lang hman!
President huaisen zet neitu Ukraine lam hian huaisen takin an beilet a, a tir lamah Belgium keeper lar Thibaut Courtois chuan vawihnih ngawt dansak mah se a hnuah Oleksiy Hutsulyak, Vladyslav Vanat leh Ilya Zabarnyi-te goal a chhuah a, rinkai lo zawk ni chungin Ukraine an chak.
Courtois kha Belgium coach hlui Domenico Tedesco nena an inhmuhthiam loh avangin ram tan kum hnih dawn a khel tawh lo a, boss thar hnuaia a kirleh zanah goal thum a chhuah!
Kum 31 mi lai ni ve tawh mihang forward Lukaku khan November 2023 hnu lama a vawikhatna atan ram tan goal a khung a, a team tlawm tur erawh a chhan zo ta bik lo.
Pathianniah return leg khelin Ukraine hian Belgium an luhkhung ve thung dawn a; Nations League playoff kalphungah Fifa ranking-a sang zawk zelin an kawtkaiah second-leg game an khel a, tlang tura an chance a tha zawk a tih theih ang.
Game ruk khelha point li bak la hlawhchhuak zo lo Belgium hi League A Group Two-ah pathumna niin playoff an khelh a ngai a; tun hi kum 2018-a he tournament buatsaih a nih atanga an competition top tier-a inhamtang tura relegation battle an hmachhawn vawikhatna a ni.
Belgium barakhaihtu Ukraine!
Get real time updates directly on you device, subscribe now.