Mizoram tan an inhawn thu hrilh

Mizoram tan an inhawn thu hrilh
BJP Mizoram State hruaitute chuan Union minister hrang hrang an hmuhnaah state sawrkar a thawh that chuan Mizoram tan hmasawnna atan sum haichhuah tur a tam tih an lo hrilh thu an sawi.
New Delhi-a National Party thutkhawma tel BJP Mizoram State president Vanlalhmuaka leh hruaitu dang chuan Union minister of Law & Justice Arjun Ram Meghwal chu a chenna inah hmu in, Mizoramin High Court hran a neih dan tur, Mizorama subordinate court infrastructure hrang hrang tih changthlun dan tur leh law lam kaihhnawih thil an sawipui a. Union minister hian BJP hruaitute thu thlen chu ziaka chhinchhiahin, bawhzui ngei a tum thu a lo hrilh.
Union minister of state for Social Justice & Empowerment, Consumer Affairs, Food and Public Distribution BL Verma an hmuhnaah a ministry enkawl mek leh a lo enkawl thin tawh atanga Mizoram puihna tur a tam thu lo hrilhin, Mizoram tan an thawhpui thiam chuan hmalakna tur sum a tam tih a sawi a ni.
Union minister of state for Housing & Urban Affairs Tokhan Sahu hmu in, urban huamchina cheng mipuiin harsatna an tawh mek dan leh a sutkian dan tur an sawpui a. Tokhan Sahu hian Mizoram sum a tan hnem tam thu leh pek belh theih an nih dan kawng hrang hrang BJP State president hi a hrilh a. State sawrkarin sawrkar laipui an thawhpui that a ngai tih a lo hrilh bawk.