Mizoram tan Union HM a tangkai – BJP president

Mizoram tan Union HM a tangkai
– BJP president
Mizoam tan kawng hrang hrangin Union Home minister Amit Shah chu a tangkai hle a. Prime minister Narendra Modi duh dan angin state mipui duh angin hma a rawn la thin tih BJP State president Vanlalhmuaka chuan a sawi.
BJP Mizoram president chuan, Bru lakkir chungchangah centre-a BJP sawrkarna siam thar leh hnu lawk, kum 2019 khan Amit Shah hian ruahmanna siamin Mizo mipui duh danin tih fel a ni a. Assam nen ramria buaina kan neihah buaina a thlen zui tawh lohna turin ruahmanna a siam leh a, Lengpui Airport chungchangah Mizoram chief minister chu Delhi-ah ko thla in, mipui duh dan leh sukthlek a sawipui a, a hma zawnga Indian Airforce lam nger chief minister pawhin Airport Authority of India lam a hawi leh ta zawk tih sawiin, Union Home minister hian thla 6 chhungin AAI-in a tul ang a rawn bawhzui tur thu a sawi tih a sawi a ni.
Aizawl khawpui laili atanga Assam Rifles insawnchhuahna tur pawh Union Home minister hmalakna liau liau a ni tih Vanlalhmuaka hian a sawi a. Mizo mipui duh dan an zah a, Aizawl hmun awm dan an hriatin mipui duh ang leh beiseina tihhlawhtlin sakin, chak takin hma an rawn la ta tih a sawi bawk.
“Union Home minister-in Mizoram tana hmasawnna hna thawhna tur cheng vaibelchhe 5842 pek kan nih tur thu a sawi kha a lawmawm kan ti a. PM Modi kaihhruai sawrkarin Mizoram mipui hmathlir thui tak min neihsak avangin lawmthu kan sawi a ni. Hmarchhak state min ngaihpawimawh vangin Prime minister bakah central minister-ten Delhi-a kal fo ngai loa kan kawtkai ngeiah kan harsatna min rawn ngaihthlak sak a, an mit ngeia min rawn hmuhsak thin hian, a taka hmasawnna thlen duhtu a nih zia a tarlang chiang hle,” State BJP hruaitu hian a ti.