Mizoram Tourism
Mizoramin a kum telin khualzin a ngah ve telh telh a, a bikin tun kum nga kal ta chhung khan khualzin an pung chak hle.
Tun tum session liam taa zawhna leh chhanna huna Mizorama khualzin lo luh dan tarlan atanga kan hmuh theih chu, kum nga kal ta (2020-21) chhung khan khualzin 20,564 an awm laiin 2024-25 chhungin khualzin 5,24,784 an tling ta dawrh mai a; chu chu kum 2020-21-a khualzin awm zat let 25 chuang daih a ni.
Chutih laiin, tun kum hnih chhunga khualzin punna hi a sang hle bawk. 2023-24 chhunga khualzin kha 2,19,114 a nih laiin 2024-25 ah chuan 5,24,784 a ni a; a hma kum aiin a let 2.4 in khualzin an pung tihna a ni bawk.
Khualzin an pun tak hluai chhan hi eng nge ni ang tih zawhna kan nei nghal ngei ang. Tourism kaihhnawih infrastructure (ropeway, skywalk, bridge, tower, building etc.) ropui vang a ni lo tih a lang nghal a; inkalpawhna kawngpui a that vang pawh a ni lo tih a chiang nghal. Hotel nuam tak tak leh ei leh in a tui vang pawh a ni lovang tih a rin theih nghal bawk. Tourist lodge kan ngah vang te phei chu a ni teuh lo mai!
Tunhma atang tawhin, Central sawrkar milian hovin min rawn tlawh changa an sawi chhuah thin chu, ‘in vannei mang e, in ram hmelhmang tlang hring mawi tak leh boruak, sik leh sa nuam tak hi tourist hipna tha lutuk mai a ni’ an tih thin kha, tun hnuah hian, khawvel thiamna leh finnain a hrin chhuah social media kaltlanga an lo hmuh zau theih tak avang hian khualzinten min rawn hmelhriat zau thei ta, a tih theih awm e. |an kan la lo tihna ni lovin, tan kan lak nasat em em vang pawh ni lutuk lovin, information technology tha, chak leh changkang avang hian kan ram mawina leh boruak muanawm hian khualzinte a hip lut chak ta a ni pakhat awm e.
Chutih ruala kan lo tihtur pawimawh em em pakhat chu, khual chhawn thiam tura infuih leh inzirtir hi a ni. Khualchhawn danah hian, tawng kan thiam vak lo a nih pawha ‘body language’ tal thiam tura kan infuih a pawimawh bawk awm e. Pakhat leh chu, khualzinte an cham chhunga nuam taka an veivah a, an kalna hmun apianga chawlh hahdamna nuam tak lo chhawp chhuahsak hi a ni.
Mizoram Tourism department lam pawh an tang a, hmasawnna thar hmuh tur a awm chho zel hi a lawmawm khawp mai. |ang sauh sauh zel teh se.