MIZORAM UNIVERSAL HEALTH CARE SCHEME

ZPM sawrkar chuan ni 1.4.2025 atangin Mizoram Universal Health Care Scheme a kal pui dawn a, he Health Care Scheme hian mi zawng zawng a huap dawn a, Huapzo Scheme a ni dawn a ni. He tih lai hian, tun dinhmunah Mizoram chhunga Private Hospital tam zawk chuan he Universal Health Care Scheme hi an zawm ve thei dawn lo nia hriat a ni.
Private Hospital tam zawk hian an zawm theih loh chhanah hian sawrkarin damlo bill rei tak an bat sak an hlauh vang a ni awm e. He tih lai hian sawrkar lam chuan bill hi an batsak loh tur thu pawh vawi tam an hrilh thung a ni awm e.
Private Hospital-te hnenah sawrkar hmasain pawisa a bat ral sak avangin sawrkar an ring ngam tawh lo a ni mai thei a, sawrkar chuan damlo-te’n pawisa pe lawk kher lo (cashless) hmanga hospital an chhuahsan theih ngeina turin kal pui a tum ta si a, hei vang hian sawrkar chuan Damdawi in-te a thuam chak mek thung a ni.
Sawrkârin Universal Health Care Scheme kalpui a tumna kawngah hian Damdawi in thuam chak nan Doctor, Nurse, Lab. Assistant leh a dangte mi eng emaw zat District hrang hrang Hospital atan thawktu lakna tur sawrkarin advertisement a chhuah mek a, tunah hian he hna la tur hian sawrkar chu a inpeihfel tawh hle a niawm e.
Tin, sawrkar chuan he Universal Health Care Scheme atan hian Mizoram chhung sawrkar Damdawiin mai bakah state pawna Damdawi in zingah Empanelled Hospital a nei nual a, refer ngai ang chi chu a refer zung zung thei dawn bawk a ni.
Private Hospital lamte hian ngaihtuah chiang se, he scheme hi zawm ve mai se, mipuite tan malsawmna an nih ngei a rinawm, Medical Profession hi sumdawnna a ni ngawt lova, rawngbawlna a nihna hi a laimu zawk a ni, a eng amah hma a, ‘Bill in pe thei chuang lo ang’ tia tan lo khawh nghal ngawt mai hi Medical Professional-te’n kan tih tur niin a lang lo. Sawrkar hian a intiam angin damlo bill a bat sak pek nghal zel a intiam anga a pe thei lo a nih erawh chuan inhnukdawk leh mai se. Buana hma kherh an tih ang a, a tak a thlen hmaa ‘Bill min bat rei sak ang’ tih avanga he scheme an zawm duh lo mai hi chu mahni mihring pui te hnenah SERVICE pek aiin, kan thluakah SUM lakluhna a lang zawk em ni? tih hi min ngaihtuah tir a ni.
Private Hospital-te’n Universal Health Care Scheme kan zawm duh loh chuan mipui thenkhatin Medical Professional-te sumdawng hmuha an hmu leh lutuk hi a nemnghet sauh ang tih ka hlau hle a, state pawnah pawh Empanelled Hospital an awm theih laiin, a ram chhung ami te hi chu i tang tlat lo teh ang u.