Mizorama Hockey Game chanchin
Hockey hi tunlai infiamnaah chuan Mizote’n kan hriat hmasak leh kan khelh hmasak ber a tih theih hial awm e.
Mizote’n kan hriat ve atang leh kan khelh ve atang pawhin kum 100 chuang lai a liam ve ta.
Hockey min hmelhriattirtu leh min zirtir hmasatute chu kan Zosap Missionary-te kha an ni a, Pu Buanga (JH Lorain) thuziakah chuan kum 1914 daih tawh khan sikul naupangte chu kartin Thawhtanni leh Zirtawpni chawhnu apiangin hockey khelhtir thin an nih thu kan hmu!
Tin, Mizorama School Annual Sports neih hmasakber kum 1923-a neih a nih pawh khan hockey hi naupangte inelna atan telh a ni nghal bawk.
Mizorama hockey tournament hmasaber ‘Helm Cup Hockey’ pawh kum 1929 daih tawh khan buatsaih a lo ni a, chumi hnuah pawh 1933 kumah khan Chawnga Cup leh Bell Cup Hockey tournament-te buatsaih a ni leh bawk.
Tin, Mizoram pawna kan khelh hmasakber pawh hi 1965 kuma ‘Inter District Hockey Championship’ Imphal-a nghahah khan a ni a, hemi tum hian Aijal Sports Association (Mizoram) chu an champion nghe nghe a ni.
Mizoram chhungah pawh veng hrang hrang leh khaw hrang hrangahte ‘Inkhelpui’ buatsaih thin niin, chu’ngte chu mipuiin an hlut thin hle.
Mizoram buai hnuah pawh tournament lian tham tak takte buatsaih a ni zel a; 1978 kuma Aizawl Sipai Lammuala Major Bushil Kumar’s Hockey Tournament khelh a nih tum pawh khan gate entry ticket pawh 3,000 zet siam a ni a, kha’ng hun laia ticket khatiang zat zat siam a lo ni kha mipuiin hockey game an hlut hle a ni tih a hriat theih.
He’ng bakah hian tournament lian leh ropui tak tak he’ng – Vanhlira Memorial Women’s Hockey Tournament (1972-1982), GOC Hockey Tournament (1976-1985), Vanthangi Memorial Women’s Hockey leh a dangte pawh hlawhtling taka huaihawt a lo ni tawh thin.
Tournament then- khatah phei chuan team 60 lai chhuahnate pawh a awm hial thin a ni!
Thil chhinchhiahtlak tak chu, kum 1950 hma lam daih tawh atang khan Baktawng khuaah khian Baktawng Inkhel Pui (hockey tournament) chu ram buai zual lai tih loh nikum (2024) thleng khan chhum lo chat loa khelh zui zel a la ni bawk!
Chutiang tak chuan hockey hi Mizorama game khelh nasat leh ngaihhlut lo ni tawh thin mah se kum engemawzat kalta atang khan hma a sawn ta lo mai pawh ni lovin nasa takin a tlahniam ta a, vawiin thleng hian tlakhniam lam a la pan zel niin a lang.
Hetiang taka hockey game Mizorama a tlakhniam taknaah hian chhan leh vang tamtak a awm ngei ang le…
– Apektei Pa