Mizorama kawngpui sial leh thawmthat mek enlet

Chief minister Lalduhoma hoin Ministry of Road Transport & Highways hnuaia Mizorama state PWD leh NHIDCL hnuaia hnathawh mek chu Zirtawpni khan thlirlet a ni.
Chief minister chuan Union Minister of Road Transport & Highways Nitin Gadkari chu Mizoram tan a tha em em a, an dil apiang a tihsak deuh zel thin tih a sawi. Vairengte – Aizawl four lane-ah entity pahnih hnena zangnadawmna pek an phalsak a, hetiang hi hmun dangah a la thleng ngai lo hiala a rin thu a sawi. Ruahtui dawng tam ram kan nih vanga kan kawngpui rigid pavement ti tawh zawk tura an dilna pawh an zirchian mek thu an rawn hrilh tih a sawi a ni.
MoRTH hnuaia Mizorama hnathawk mek leh an hnathawhna lama harsatna an tawh an sawiho a. 2025 September-a chief minister hoa hnathawh an thlirlet tuma an thu dah bawhzui dan an enlet.
Heng hnathawh meka harsatna an tawh sawi a ni a, bawhzui dan tur an sawi nghal. National Highway No 2, Aizawl – Tuipang kawng thawh zawh tawha harsatna la awm pawh chief minister chuan, tuna arbitrator-a case lut mek dinhmun chu thutkhawm leh hunah kimchang taka report pek theih tawh nise tih a ni. Thingfal khuaa kawng laihin a nghawng biak in, school leh mimal in chhia umzuina tharlam ber pawh hriat theih tawh beisei a ni bawk.
8 PWD hian national highway siamthat hna hmun engemawzatah a thawk mek a. Darlak leh Tuidam inkar kawng chak zawka bawhzui tura tih a ni.
8 Chief minister-in Aizawl -Thenzawl- Lunglei kawngpui national highway-a puang tura sawrkar laipui a dilna chu Union Home ministry chuan Aizawl leh Thenzawl chin a pawmpui (recommend) tawh a. MoRTH ngaihchan mek a ni.
8 PWD minister kaihhruaiin Aizawl khawpui kawngpui siamthat hna a kal mek a. Tunhnai khan district capital 11 kawngpui siamthatna tur sum belh leh a ni.
8 Hlimen-a Transport department ram chu Vehicle Scrapping Centre dah theih tura peih thawkhat a ni tawh a. Vehicle scrapping kalpui chak hi SASCI atanga lawmman dawn theihna a nih avangin ngaihpawimawh bika neih nise, an ti.