Mizorama Sports Award 2023 leh Incentive Cash Award sem
Mizorama Sports Award 2023 leh Incentive Cash Award sem
Sports & Youth Services Department buatsaihin Thawh-tanni zan khan Mizoram Sports Awards 2023 & Incentive Cash Awards 2021-2022 & 2022-2023 semna hun Dawrpui Multipurpose Hall-ah huaihawt niin, SYS minister Robert Romawia Royte chuan khuallian nia a hmanpui bakah SYS, ICT & Tourism Development Board vice chairman TC Pachhunga chu khualzahawm a ni.
Mizoram Incentive Cash Award Scheme kaltlang hian kum 2021-2022 chhunga incen-tive cash award dawngtu sports discipline 10 atanga thlanchhuah infiammi 64-te hnenah Rs. 20,20,750 leh kum 2022-2023 chhunga incentive cash award dawngtu infiammi 415, sports discipline 14 atanga thlante hnenah Rs. 53,30,750 sem chhuah a ni.
Incentive cash award hi kum 2021-2022 leh 2022-2023 chhungin infiammi 479-te hnenah pek a ni a, dawng nawn engemawzat an awm avangin mi hrang ang chuan mi 399-te’n incentive cash award hi an dawng a, a vaiin Rs. 73,51,500 semchhuah niin, a dawng tam ber Lalhumhimi (Judo) kutah cheng nuai 6 a lut.
Mizoram Sports Awards 2023 chu May 2022 atanga May 2023 inkara infiammi leh infiamna kaihhnawiha chethate hnenah hlan niin, he sports awards thlanna hi category 10-a then niin, category tinah nominee panga zel a awm.
Hun hmanpuitu Robert Romawia Royte chuan Mizoram Incentive Cash Award Scheme 2022 hman hnua a semchhuahna hmasa ber leh Mizoram Sports Policy 2019 ken tel Mizoram Sports Awards 2023 semchhuah a nih theihna’na theihtawp chhuahtute fakin, hamthatna leh lawmman dawngtute a lawmpui thu a sawi a, hripui leng avangin kum 2021-2022 khan infiamna lama hmalakna a chawlh deuh thuap avangin infiammi 64-te chauh dan anga incentive cash award dawng thei an awm leh kum 2022-2023 lamah chuan incentive cash award dawng thei tura thlan mi 415-te nen a ruala semchhuah a nih thu a sawi.
Minister chuan incentive cash award chu sports discipline hrang hranga chethate duhsak bik awm loa dan tlawhchhana dik tak leh felfai taka thlanchhuahte hnen hlan thin a nih thu sawi chungin infiam-mite theihna hriatpuina leh tih-phurna’na sawrkarin hamthatna a pe hi a hlut bikna a nih thu leh a tam lam ai mahin a hlutna chu ngaihpawimawh zawk tur a nih thu a tarlang tel.
Sports minister chuan sawi chhunzawmin, infiamna huang hrang hrang hnuaia intihsiakna lian tham, danin a pawmpui leh rintlaka tithate hnenah incentive cash award pek thin a nih thu sawiin, sports mi leh sate tihphurna’n Mizo-ram Sports Awards duanchhuah a nih thu leh hemi hian infiammite leh anmahni buaipuituteah phurnna leh chona nasa zawk a pek ngei a beisei thu a sawi a; Mizoram sawrkarin sports tihhmasawn a ngaihpawimawh thu leh hemi atana hmalaknate tarlangin, dan thar siam leh hmasawnna ruhrel chhawp-chhuah a tarlang tel.
Sports department bikah budget tam lo mah se hmasawnna ruhrel siamna’n theihtawp chhuahin budget pawn lam central sawrkar leh CSR atangtein hnathawhna tur sum thahnem tak hailuh a nih thu sawiin, hnathawh tawh leh tuna sanction neihsa thawh zawh a nih hnuah GST leh labour cess atangin Mizoram sawrkar sum bawmah chhiah nuai sing khat chuang chhunlut theih rin a nih thu a sawi a; infiammi leh hemi lama theihtawp chhuahtute chu thlen china lungawi mai lo a, tun aia hmasawn tuma hmalam pan zel turin a fuih nghal.
Romawia hian sawrkarin Mizoram State Games 2024 ropui taka buatsaih a nih theihna’n ruahmanna a neih thu a tarlang tel a, sports kalphung mumal tak hman mek a ni chu lawmawm tiin, hmasawnna a thlen zel a beisei thu a sawi bawk.
Sports award dawngtute
Sports Person of the Year among Person with Disabilities Award:
Nicky Chhakchhuak, Carrom (Rs. 1,00,000 + Citation)
Sports Promoter of the Year Award:
LV Lalthantluanga, Zonet Cable TV Private Ltd. (Citation)
Outstanding Mass Media for Sports Promotion Award:
LPS Vision Production (Rs. 1,00,000 + Citation)
Coach of the Year Award:
HC Zarzoliana, Football (Rs. 80,000 + Citation)
Most Promising Sportsman of the Year Award:
H. Lal\hazuala, Badminton (Rs. 80,000 + Citation)
Most Promising Sportswoman of the Year Award:
Lalrindiki (Hnahthial), Hockey (Rs. 80,000 + Citation)
Sports Team of the Year Award:
Mizoram Basketball Boys’ Team @ 47th National Sub-Junior Basketball Championship (Rs. 1,00,000 + Citation)
Best Performing Sports Association of the Year Award:
Mizoram Football Association (Rs. 1,00,000 + Citation)
Sportswoman of the Year Award:
Lalremsiami (Kolasib), Hockey (Rs. 1,00,000 + Citation)
Sportsman of the Year Award:
Lallianzuala Chhangte (Lunglei), Football (Rs. 1,00,000 + Citation)