Mizoramah Covid-19 vei awm rih lo

Tun hnaiah khawvel hmun thenkhatah Covid-19 a darh leh a, India ram state thenkhatah pawh a darh. Mizoramah pawh he hri vei hi hriat thar an awm a, mahse vanneihthlak takin tunah tak chuan he hri vanga enkawl an awm lo.
Thawhlehni, July ni 22 khan Covid-19 vanga enkawl lai pakhat chu damin a chhuak a, tihian Mizoramah he hri vanga enkawl an awm ta lo.
Integrated Disease Surveillance Programme (IDSP) chhinchhiah danin, kuminah Covid-19 vei hriat chhuah mi 12 an awm tawh a, vanneihthlak takin damin an chhuak vek.
Tuna Mizorama he hri veite enkawl dan chuan, he hri veite hi he hriina a thlen natna (symptom) an neih hnuhnun ber atanga ni sarihah dama ngaih an ni.
Mizorama he hri vei hriat hnuhnun ber chu July ni 17-a mi a ni a, hemi ni hian mi pariat endik an ni. Hemi hnu hian mi 10 endik an ni tawh.
IDSP hotute hnen atanga thu dawn danin, kumina endikte hi natna dang vanga enkawl, rinhlelh thil thua endik an ni tlangpui a, an chhungte’n he hri an vei avanga fimkhur thil thua endik an awm nual bawk. He hri vei hriat chhuahteah na tak an awm lo tih an sawi.
Kum dangah pawh ruah sur tan velah Covid-19 vei an awm thin a, sik leh sa nen inzawmna a nei an ti a, kuminah pawh ruah sur tan tirh velah he hri hi Mizoramin a hre leh tan an ti.
Kumina hri vei hriat hmasak ber chu May ni 30-a mi an ni a, naupang ve ve an ni. Nikum November hnua hriat chhuah leh an ni. Nikum khan Mizoramah mi 73-in hri an vei a, nikum nena khaikhinin kumin hi a nasa rih lo, IDSP hotute chuan an ti.