Mizoramah Environment Day hmang

World Environment Day 2023 hmundang rualin Mizoramah pawh June 5 khan hman a ni a, Aizawl bakah district hmun dangah te hman a ni.
Lungleiah chuan he Ni denchhen hian sawrkar department, paramilitary force leh pawl hrang hrang buaitsaihin faina hnatlang leh thingphun humhalh leh samfai hnatlang neih a ni a. Lunglei Forest Department-a thawkten nikum Green Mizoram Day thingphun an tifai a, a thi an hnawhkhat bawk. Nikum Green Mizoram Day khan Mizoram Polytechnic campus-ah thing tiak 376 phun a ni a, tuna an tih fai hi a tum thumna a ni . Thing tiakte hi an nung tha a, Tlaizawng a tam ber a, Herhse leh Pangkai an awm bawk. A thi 30 vel an hnawhkhat a ni.
3 NH Assam Rifles leh Clean Lunglei tangdun chuan Thawhtanni zingah hun hmangin thutiam an sawiho hnu ah thing phun leh Lungleia hmun lun lai – AOC, Sobji Bazar, Electric Veng leh Venglai te thianfaiin an hnatlang a ni.
Project Save Tlawng chuan Centenary Lungphun Pukpuiah nikum lama an thing phun an hungtha a, an samfai bakah bawlhhlawh thianfaiin an hnatlang.
Kolasib-ah chuan kuthnathawktu thlanchhuahte nen hun hman a ni a. KVK Kolasib senior scientist & head Dr Michelle C Lallawmkimi chuan sarang tawih thei lo, bawlhhlawh paihna hmun niloa paih darh nasat avanga khawvel chhe mekah mihringten mawh an phur nasa tih a sawi. Kalkhawmte hian KVK hotute kaihhruaina in plastic hman nawn loh chi hmang nawn lo turin thu an tiam rual a ni.
Mamitah chuan Environment, Forest & Climate Change Department buatsaihin Presbyterian English School Charkawnah hman a ni a. DFO Mamit C Lalrinmuana chuan a lem nen entira thu sawiin, environment pawimawhna leh bawlhhlawh paih darh thatlohna te, plastic bawlhhlawh kan paih darh avangin ramngaw leh nungchaten an tawrh mai bakah mihring hriselna thlengin a tiderthawng tih te a sawi a ni.