Mizoramah heroin man tur pung zel

Mizoramah heroin a hluar a, a hluar zual zel a ni mai thei, man tur a pung a, an man belh zel bawk. Kuminah heroin hi an man hnem tawh hle.September thla thleng khan Mizoram Excise & Narcotics (MEN) department-in heroin hi kg 71.495 an man tawh a, October-ah pawh an la man belh zel.
2022-ah khan kg 33.418 an man a, hei hi an man tam ber kum a ni thin. Kg 30 chuang an man hi mak tih tham a ni a, mahse kuminah a leta tam an man tawh.
MEN department hian July thla thleng khan kg 52.854 an man tawh a, August thlaah ringawt kg 14.156 an man belh leh. August thlaa an man hi, thla khat chhunga manah chuan a tam a, September-ah kg 4.485 an man leh.
September thlaa an man hi 2015 kum tluana an man aiin a tam; 2015-ah khan kg 4.088 an man a, kha kha kum khat chhunga kg 4 an man tlin vawi khatna a ni.
MEN department hotute chuan September thla vel atang khan a hma angin an man nasa lo a, tam thama man lawih lawih ang kha a awm rih lo tih an sawi a, hetianga a tlem deuh lai hi a awm ve thin tih an sawi bawk.
Mizoramah heroin a hluar tih an sawi a, mahse an man hi Mizoram pawna mi tur a tam a, Mizoramah a ti thar an pung a, heroin mamawh zat a pung tihna a ni lo tih an sawi. An manah hian hmun danga mi tur a tam a, a hlawm lian thama an man phei chu Mizoram pawna mi tur a ni deuh zel tih an sawi bawk.