Mizoramah rul chi thar hmuchhuak

Mizoram University Department of Zoology-a Prof. HT Lalremsanga leh a research scholar Lalbiakzuala te chuan hmun danga researcher an thawhpuite nen Mizorama Coralsnake pianphung, ruhrel (skeletal) leh DNA (nuclear leh mitochondrial gene 5) an zirchianna atangin chi (species) thar hmuchhuakin, a hmingah British-in India a awplaia medical doctor, Dr Gore hmingchawiin ;Sinomicrurus gorei’ an vuah.
He zirchianna hi British scientific journal, Systematics & Biodiversity (Taylor & Francis group) chuan kumin January 10 khan tlangzarh (published) a ni.
“Khawvel pumhuapah Sinomicrurus coralsnake ho hi chi (species) kua hmuhchhuah ni tawhin, India hmarchhak bikah species pakhat, ‘Sinomicrurus macclellandi’ chauh hriat a ni thin a. He rul hi Mizo thi pakhat, ‘Thi-hna’ nen an inan deuh avangin ‘Rulthihna’ tia hriat a ni. Tuna species thar – Sinomicrurus gorei hi he zirchianna a awm hma hi chuan S. macclellandi nen an inan em avangin species thuhmuna ngaih a ni reng thin a. Kum 2008 chho atang khan species hrang an nih hi ka lo ringhlel tawh thin a. Amaherawhchu, hnamdang mithiam zawkten an zirchian atangin min pawmpui thei tlat lo. Hei hi data leh tehfung chi hrang hrang an chhuikim that tawk loh vang a nih hmel,” Prof. HT Lalremsanga hian a ti.
Tuna an zirchianna atang erawh chuan a rawng tial dan, phuhlip inrem dan, a pa serh (hemipenis) leh CT-scan atanga luruh zirchianna bakah an DNA thlengin an lo inanglo hle a ni tih hriatchhuah a ni ta tih a sawi a ni.
“He zirchiannaah hian S.macclellandi hian tum khatah tui 6-14 an neih theih laiin, S.gorei chuan pathum chauh tui thinin, a note keu nan thla khat a mamawh bawk. Mizoramah chuan S.macclellandii hi hmun zo leh sang lamah hmuh thin an nih laiin, S.gorei hi chu hmun hniam atanga sang lamah thleng hmuh an ni ve thung,” Prof HT Lalremsanga hian a ti bawk.