Mizoramah tel siam chhuah tum

Mizoramah tel siam chhuah tum
Godrej Agrovet Ltd chuan Mizoramah oilpalm atangin ei chi tel siamchhuahna tur din a tum a, packaging thlenga tih a tum.
Kolasib district-a inbun, Godrej Agrovet Ltd senior development officer Lalruatkima chuan, kumin chhungin oilpalm refinery din an tum a, packaging thlenga tih theihna hmun tur a nih dawn avangin, farmer-te thar ngei oilpalm hriak lei leh ei theih a ni dawn tih a sawi.
Ningani khan Kolasib district bawrhsap Robert C Lalhmangaiha hoin an district-a oilpalm chin leh a hralh lama hma lak a nih dan sawiho a ni a. Bawrhsap chuan sawrkar laipuiin oilpalm a ngaipawimawh a, chumi chingtu an nih avangin oilpalm farmer-te a ngaipawimawh tih a sawi a ni.
Godrej Agrovet Ltd senior development officer sawi danin, Mizoram sawrkar leh Godrej Agrovet Ltd-in Kolasib leh Mamit district bikah kum 2005 khan agreement siamin oilpalm hmalakna kalpui a ni a, tunah Mizorama kuthnathawktute thlai thar, regular taka hralhna awmchhun leh state pawna thawnchhuah mek a ni.
Nikum chhung khan Godrej Agrovet Ltd hian farmer-te tharchhuah FFB (oilpalm rah) metric tonne 5335 an leisak a, hei hi a sumfaiin nuai 700 man vel a ni a, kuminah hian nuai 900 man vel lei theih an beisei.
Hei bakah hian oilpalm farmer-ten an thlai enkawlna atana an mamawh hrang hrang man tlawm zawka an hmuh theih turin ‘one stop solution’ an din mek.