Mizoramah vaihlo tel loa awm thei an tam tial tial

Vaihlo atanga siam, zuk leh ei/ hmuam chi ah Mizoram chu a ti tam berna hmun ni thin mah se, an tlem tial tial a. Zirchianna hnuhnung berah phei chuan za zela 40 chuang chu ti ngai lo an ni tawh. Pipute hunlai atanga vaihlo zial zu nasa thin, a hnu lama vaihlo atanga thil siam dang, ei leh hmuam chiin a chiahpiah zui Mizoram chu India ram huapah pawh vaihlo ti tamna a ni a, hemi kaihhnawih natna, a bikin chuap cancer nei tamna a ni tel bawk.
National Tobacco Control Program (NTCP) National Health Mission hmalakna hnuaiah State Tobacco Control Society chuan vaihlo ti an tlem theihna turin thangkhat lian zet hma a la tawh a. Vaihlo hman uar a nih dan zirchianna Global Adult Tobacco Survey (GATS) tum khatna (2009- 2010) aiin a tum hnihnaah (2016- 2017) ah Mizoram chu a tha zawngin hma a sawn hle tih an sawi.
Tunah hian GATS-3 tihchhuah mai hmabak a ni a, a tha zawngin Mizoram-in vaihlo kaihhnawihah hma a sawn zui zel an ring hle tih an sawi a ni.
NTCP state consultant R Lalremruata sawi danin, GATS-1 ah hian Mizoramah vaihlo ti zaa 67.2 kan la nih laiin, GATS-2 ah chuan zaa 58.7 kan ni a; vaihlo zial zu hi GATS-1 laiin zaa 39.7 niin, GATS-2 ah chuan zaa 34.4 ah a tla thla. Zial ni lo, vaihlo ei leh hmuam chi ti hi GATS-1 ah zaa 40.7 a nih laiin, GATS-2 hunah chuan zaa 33.5 a ni.
GATS-2 hunah hian Mizorama vaihlo eng chi mah khawih lo zaa 41.3 an awm a; vaihlo zial chauh zu zaa 25.1 niin, a ei leh hmuam chi nena tikhawp zaa 9.2 an awm a; a ei/ hmuam chi chauh ti zaa 24.3 an awm a ni.
Zirchiannaah hian GATS-1 hunah vaihlo tih tan kum hi chawhrualin, kum 17.4 an ni a, GATS-2 ah kum 17.8 a ni. Vaihlo ziak zuk bik hi GATS-1 hunah kum 16.9 velah an ti tan tlangpui a, GATS-2 hunah kum 17.5 ah an ti tan tlangpui thung.
Vaihlo that loh zia hria, awareness dawng Mizoramah zaa 90 vel a ni pha tawh a. Chutihlaiin mimal in leh hnathawhna hmuna in leng emaw in neitu in emaw vaihlo zial an zuk thin avanga an bulhnaia awmten an lo hip luh ve (second hand smoke) chu hmarchhakah a sang pawl a la ni.
Mimal inah hian second hand smoke nasatna ber chu Mizoram niin, zaa 84 a ni a; pahnihna Meghalaya chu zaa 77 niin pathumna Manipur chu zaa 75 a ni. India ram pum anga chhut chuan a nasat dan hi zaa 39 a ni.
Hnathawhna hmuna second hand smoke nasatna ber chu Meghalaya niin zaa 46 a ni a, pahnihna Mizoram (44%) niin, pathumna Manipur (43%) a ni. India ram pum anga chhut chuan a nasat dan hi zaa 30 a ni.