Tihdam theih loh natna African Swine Fever (ASF) a leng a, he hri vang hian Mizoramin vawk 70,147 a chan tawh.
Budget Session neih mekah Serchhip bialtu Lalduhoma zawhna chhangin AH&Vety minister Er Lalrinawma’n ASF vang hian vawk 24,162 suat (cull) a ni tawh a, vawk 70,147 a thi tawh tih House a hrilh.
-- Advertisement --
ASF hi 2021-ah Mizoramah a vawi khat nan a leng a, AH&Vety minister-in House a hrilh danin, a thawh khatna 2021-ah hian vawk 33,417 a thi a, a thawh hnihna 2022-ah vawk 12,568 a thi leh.
ASF hi tihdam theih loh a nih avangin a veite tihhlum (suat) thin a ni a, minister sawi danin 2021-ah khan vawk 12,568 tihhlum niin, 2022-ah vawk 11,594 tihhlum a ni bawk.
Vawk thih vang hian chhungkaw 2488-in tanpuina an dawng tawh a, vawk suat vanga tanpuina pek hi cheng nuai 1018,42 pek niin, feed compensation-ah cheng nuai 121.52 pek a ni.
ASF hi ‘calamity’-a puan a la nih loh thu minister hian a sawi a, zawhna chhangin Aizawl khawpuiin thla khatah chawhrualin vawksa quintal 12,450 vel a mamawh tih a sawi bawk.
ASF hrileng thawh khatna, 2021-a mi hi kum tawp lamah a reh a, chumi hnu 2022 February-ah a thawh hnihna a intan leh a ni. November vel atang khan a zia a, tunah rih chuan he hrileng hi a zia telh telh tih thu dawn a ni.