Mizote hnam ro a him lo
Mizoram chhungah hnam ro tling, thil hlui tihchhiat a ni fo a, tun hnaiah pawh tihchhiat leh him lo a awm nual. Heng ro hlute humhalhna lama thawh hlawk tak INTACH an ngawi a, aw an chhuah lo.Tun hnaiah Lammual ramah kut thlak a ni a, thing kih te, in tihchhiat te a awm. Mizoram chhunga thil hlui, hnam ro tlingte humhalhtu pawl Indian National Trust for Art and Culture Heritage (INTACH) Mizoram Chapter an ngawi rih.
Lammual ram humhalh duhtu an ni a, 2012-ah khan Mizoram sorkarah rawtna leh ngenna an lo thlen tawh a, sorkar liam taah khan an thlen leh bawk. ‘Built Heritage of Mizoram’ tih bu, 2021-a an chhuahah Lammual ram chu ‘Aizawl chuap’ (lung of Aizawl) tiin an ziak a, Lammual ram leh a chhunga awmte humhalh an duh thu pawh an ziak a ni. Mahse, tun hnaiah Lammual ramah thing kih a ni a, in thenkhat pawh an thiat. INTACH lamin thawm an neih hriat a ni lo.
Lammual ram hi INTACH hian an ngaihlu em em mai a, a chhunga in engemaw zat chu ‘heritage building’-ah an puang. Quarter Guard kawta laipui pahnih, 2002-a awm ta lo thut pawh an hriat veleh ngaihvenin, theihtawp chhuahin an zawng kual a, 1st Assam Rifles te’n an insawnna lamah an lo keng tih hriain, an zawn fe hnuah Nagaland-a Tuensang atangin an la kir leh a ni. 2012 May-ah khan laipui hi a awmna ngaiah an dah leh. Chutiang khawp chuan Quarter Guard vel hi an ngai pawimawh a, mahse tun hnai thil thlengah thawm an nei lo.
Mizorama in hlui pawimawh pakhat, Treasury Square hming chawina Treasury building, 1908-a sak pawh an thiah fel a ni tawh.
Treasury building hi Lt Col GH Loch-a sak a ni a, bawrhsap office sak that a nih dawn vanga thiat an ni. Mizoram Ancient Monuments and Archaeological Sites and Remains Act, 2001 hmanga humhalh a ni a, dan hmanga humhalh chu thiah a ni tawh.
In hlui pawimawh ber pakhat Loch House pawh vengtu nei lovin a awm a, a banga “Loch House 1890” tih inziak, a un tawhzia tilangtu pawh a chhiar hleih theih loh. A in a hlui tawh bawk nen, mihring chetvelna leh thli na deuh a dawl lo palh ang tih hlauhawm khawp a ni tawh a, mahse enkawltu emaw viltu emaw an awm lo.
Mizorama pucca building hmasa ber pakhat Loch House te, Treasury te, Quarter Guard leh Lammual te hi Aizawl hringtu tia sawi theih a ni a, hnam ro hlu ni mah se dim a hlawh lo hle.
Assam Rifles Kohhran biak in chungc