MIZOTE LEH NUN THIANGHLIM

Reuben Lalnunthara Hnamte
Thianghlim han tih hi chu a mawiin a zahawm nghal hrim hrim mai a. Thil reng reng hi a man a to emaw a tlawm pawh nise a fai thata a thianghlim chuan a duhawm mai thin. In ropui tak leh tawp deuh ai chuan in ropui vak pawh ni lo fai leh thianghlim tha chu awm a chakawm daih zawk. Silh leh fente pawh hi a man to ngawt ai chuan a neituina fai leh thianghlim taka a hak a, a vawn chuan a lang nalhin a zahawm mai thin. Hmanni pawh police pakhat hian a car alto 800 chhuak hmasa ber chi kha ka awmna bulah a rawn hung a. A car kha a model a hlui tawh viau nain a nalh ka ti khawp mai a, a enkawl tha tih a hriat a, a fai thain a hnum hlarh mai a, a zahpuiawm lovin neih atan pawh a iai awm hauh loh mai. A neitupa pawh ka lo fak hlak a a lawm ve viauin ka hria. Chutiang bawkin mihring pawh hi kan hmeltha emaw chhia emaw pawh nise kan fai that a, kan inenkawl that chuan mite tan hmuh kan nuam a ni mai a, kan duh avanga hmelchhia leh tha ni miau hek lo vi. Sap mi nawlpui pawh khu an incheina a sang miah lo; thawmhnaw second hand leh man tlawm te te an inbel a, mahse, anmahni an thianghlim miau a, a lang mawi lo thei lo.
A bikin hmeichhiate leh thianghlim hi a inhmeh bik ni hian a lang a. Hmeichhe inchei nalh deuh, thawmhnaw manto deuh deuh inbel, hmai hnawih chi tin reng nena, hmu sen hlur an inchei pawh hian an balh ruk viau si chuan Utawk sahbawn sen hmuam tluk chauh an ni mai. Zakkha nei pawh hi mi tam tak kan awm a, mahse, thenkhat chu an invawng peih a an nei tih pawh a hriat loh. |henkhat ve thung erawh an bula awm hreawm khawpin an zakkha rim hi a nasa thin, perfume-ah an hmang ta emaw tih mai tur an ni. Mizo phei hi chu zuk leh hmuam hi kan ti nasa lutuk a khawvel huap ang pawhin a ram thu-ah a ti nasa ber kan ni a, India ram state-ah pawh pakhatna kan hauh. Cancer leh natna dangah pawh hian natna tuar tam ber khawvel huap pawhin kan ni hial maithei a ni. Ni tina Aizawl khawpui chhung veng hrang hranga mitthi kan ngah dan te hi a rapthlak zawk a ni. Tunlaiah phei chuan mi kan changkang tawh a, ka chhung sen hiam huam leh bal deuhte hi a mawi ta lo khawp mai. Tunlai thalai tam tak chu an invawng tha tan ta viau mai hi thil lawmawm tak a ni.
Nulate hi an mawina ber chu incheina emaw, hmelthat lam ngawt ni lovin an nungchang leh an thianghlimna hi a ni. Bible hian nula thianghlim hi a dah sang khawp mai a, Isua hringtu pawh Mari nula thianghlim a nih kha. Roreltute 21: 11 “In tih dan tur chu hetiang hi a ni: Mipa zawng zawng leh hmeichhia, mipa mutpui tawh phawt chu tiboral vek ang che u, tiin thu an pe a. Bible hian nula, mipa mutpui tawh chu a a dah sang lovin a haw hle tih kan hmu a. Tunlai khawvelah nula thenkhatah mahni virginity lo zuar ta te, virgin nih chu thil zahthlak nia ngaia, inzirtirnate hial pawh a awm a ni. Kan ramah ngei pawh hian nula tleirawl ho zingah nula thianghlim (virgin) hlutna hre lo an tam hle mai a. Mahni thianghlimna pawisa tam deuha mi hausa hovin an lei tak maite pawh sawi awm neuh neuh a ni. Nula ten an thianghlimna an hloh tawh chuan an hlutna an hloh a ni a. Thui tak kal zel mai pawh pawisak lohna an neih thin a, chu mai bakah an taksa mawina thlenga hralh pawiti lovin nawmchenna khur thuk zawkah a hruai a, mahse, an rilru a hahin talchhuah leh mai duh mah se, talchhuah leh harsa tak a ni tawh thin.
Mipa tam tak pawh hian nula thianghlim (virgin) kan ngaisangin, nupuiah pawh virgin ngat kan duh thin. Nimahsela, thenkhat chuan nula thianghlim tihchhiat tur zawngin kan hmanhlel a, tleirawl â deuhte kan bum a; pawisa tam tak leh hmanraw hmangtein kan thlem thlu fo thin. Hetiang mite hian malsawmna an dawn kan ring em? Anmahniah lo tuar lo pawh nise an tu leh fateah enge nghawng a neih ang? Nula thianghlim nupuia tana kan duh ni si lo tihchhiat hi sual lian tak a ni a, intihtheihna leh uanthuanna chi pawh a ni lo. Tunlaia KS leh call girl kan tihte hi a tam ber chu an tleirawl at laia khawih chhiat lo tawk tawh, humsual lo dai laklawh tawh ni a inhriate an ni thin. Mipate pawh hian kan thiltih tha lo nghawng thuizia leh mi nun kan tihchhiat nasatzia hi kan inenlet a tul khawpin ka hria. Exodus 22:16 “Miin nula nupuia la hual loh chu lo thlemin lo mutpui sela, a man pein a nupui atan a nei ngei tur a ni” tiin kan Bible chuan a sawi a sin. Kan ram hi hurna thlarau hian min chiah hneh tawh lutuk a, Pathian pawi hi kan va sawi nasa em!
Nu leh pate pawh hian kan fate hi sex lama inzirtirna hi an naupan lai atanga kan tuh a pawimawh hle mai a, a bik takin kan fanute phei chu kan venhim hle an ngai a ni. A nu a pa an tih duai duai chhung hian khawvel thilah chuan an lo nula tlangval hle tawh thin. Tunlaiah phei chuan social media a chak tawh a, naupang thlengin phone an khawih theih tawh avangin an hriatna hi a advance em em tawh a ni. Kan fate nena inkawm nela, engkim an harsatnate an sawi ngamna nu leh pa nih pawh hi kan zir a ngai hle a. Chhungkua inkawmngeih lo, chaw pawh eiho ngai lo leh titi hona pawh nei ngai lo hi engzat tak awm ang i maw? Mipate pawh hian tlangval thianghlim, nulat tlangvalna kawnga la inhnamhnawih lo nih te hi zak lo ila, nupui kan neih hmaa kan invawn thianghlim chuan chhungkua kan din hunah kan inchhir lovin malsawmna zawk a ni tih i hre reng ang u. Tlangval tam takin sex lama inhnamhnawih lo nihte hi an zakin, mipa nih lohna ang hial insawinate a awm thin a. Invawn thianghlim tluka pa leh mawi hi a awm lova, kan damchhung hun tawitea kan hlimna leh lawmman min siamtu zawk a ni. Chuvangin mizo nula tlangvalte invawn thianghlim hi kan hma hun zel atana tha leh Pathian duhzawng a ni tih hriaiin, thianghlimna nun neih hi i inzirtir uar ang u.