Mizoram Journalists’ Association chuan nimin khan I&PR Auditorium, CHANEM Building, Champhaiah General Conference vawi-51-na an hmang a. Home Minister K. Sapdanga chuan he hun hi khuallian niin a hmanpui. Home minister K. Sapdanga, MJA Gen Hqrs President lo ni tawh bawk chuan, Mizoram mamawh ber chu siamtharna (reformation) nia a hriat thu sawiin, he mi kawngah hian MJA member-te chu tan la thar turin a chah a. Khawtlang kal dan siamthat kawngah te, politics leh mipuite rilru sukthlek siam that kawngah te chanchinbumite chu thawh hlawk thei ber tura a ngaih thu sawiin, ziak ngeia dah thu chuan chungchuanna bik a nei a ni, a ti.
Mizoram Journalists’ Association chu pawl hlun leh pawimawh tak – an eizawnna hmanga khawtlang rawngbawltu leh sawrkar khalh ngil thin tute awmna a nih thu home minister chuan a sawi a. MJA hruaitute kaihhruaina hnuaiah General Conference vawi 51-na hial thleng theia an awm chu ropui a tih thu sawiin, ze hloh miah lova hei chen an kal thei chu thil chhinchhiahtlak tak a ni, a ti bawk.
Home minister K. Sapdanga chuan thuthar thehdarhtute chu Democracy sawrkar lungphum palina (4th Estate of Democracy) an nih angin, sawrkar fakna ziak kur nguai lova, a kal dan dik lote ziak a, fakseltu tha ni zel turin a chah a. “Thuthar thehdarhtute hnen atanga sawrkar fakselna ka hmuh hian ka lawm thin a ni,” a ti.
Digital Media chak tawh tak karah print/traditional media ten harsatna an tawk mek a ni tih a hriatpui thu sawiin, heng karah pawh chanchinbu tichhuak a, soft copy tal pawha an chhuah thin chu fakawm a tih thu home minister K. Sapdanga chuan a sawi a. Chanchinbu sem leh tih chhuah dan chu eng pawh ni se, a enkawltute ngaihtuahna leh thawhrimna lang thin hi a ropui ber lai chu a ni, a ti.
MJA President C. Lalrambuatsaiha pawhin he hunah hian Mizo hnam inpumkhat a pawimawh thu a sawi a. MJA member-te chu teirei peihna leh insumtheihna nei turin a fuih bawk a ni.
MJA General Conference vawi 51-na hi C. Lalhmachhuana, Vice President, MJA General Headquarters in a kaihruai a. Kum 2024-25 chhunga member boral – Lalhmingmawia, Editor, Pasaltha, Champhai Cable Network neitu ni bawk te; Johan Lalhmunmawia, DDK Stringer, Lunglei; TC Lalmuankima, Reporter, Akashvani Aizawl leh H. Lalngaihawma, Editor, Hnehtu te sunna hun hman a ni a. Prominent Journalist thar K. Zothankhuma, Editor, Virthli; T. Lalhmachhuana, Editor, Dingdi leh CS Chawngchhuma, Editor, Hnamdamna te hnenah chawimawina pek a ni. Journalist Pension-te hnenah ngaihhruina thilpek hlan a ni bawk.
MJA-in Champhaiah Gen Conference vawi 51-na hmang Mizoram mamawh ber siamtharna: K. Sapdanga
Get real time updates directly on you device, subscribe now.
Prev Post