MJA-in Ring Road siam mek en

Mamit khawpui chhuah lam leh tlak lam kawngpui siam hna thawh mek, PWD Mamit Division enkawl chu Nilaini khan MJA Mamit District leh he kawng enkawltu PWD hotute leh contractor ten a hmunah an en ho.
He kawng siam hna hi 2023 March 31 a tan a ni a, kumin March 31-a thawh zawh tura ruahman a ni. Tuna hna kal mekah zaa 93 an zo tawh niin PWD hotute chuan an sawi.
Mamit Ring Road hnathawhah hian blacktopping a tel loa, widening, culvert & retaining wall siam hna zawh tawh a ni. WBM (Water Bound Macadam) phah mek niin, tunah hian tlak lam thawh zawh tawh a ni a, chhuah lam thawh leh mek a ni. An hnathawhah mipui lamin tha tawk lo leh lei an phah nia sawi awm chu MJA-te hian a hmunah enin an zawtchiang a, an work manual-in a phal ang leh siam dan tur nia a sawi anga thawh a nih thu leh an hmanraw hman a chhiat loh thu an sawi a ni.
Blacktop nghal theihna tur sum a awm loh vangin an thawh chinah sum awmdan nena enin a tha thawkhat nia ngaih a ni a. Kawngpui bakah hian culvert leh retaining wall engemawzat siam a ni. Contractor pawh PWD engineer-ten an vil tha nia hmuh a ni bawk.