MKHC-in Chawlhni-a Cleanliness Drive neih duh lo

October ni 1, Chawlhni hian India ram pumah faina beihpui hnatlang ‘Nationwide Cleanliness Drive’ neih tur a ni a, Mizoram Kohhran Hruaitute Committee (MKHC) chuan hei hi an duh loh thu chief minister hnenah an thlen.
MKHC hian Ningani khan hemi chungchangah hian chief minister Zoramthanga an hmu a, chief minister hian MKHC thu thlen hi a ngaih pawimawh thu lo sawiin, hnatlang hi Thawhtanni-a neih zawk a remtih thu a lo hrilh.
MKHC hruaitute hian Nationwide Cleanliness Drive neih hun tur chu Kristiante ni serh, Kristiante’n Pathian an biakna ni a nih thu an sawi a, Chawlhni-ah kher he ni hi hmang lovin, a tuk Thawhtanni-ah emaw sawn ni se tiin chief minister hi an ngen a ni.
Nationwide Cleanliness Drive hi India sorkarin India ram puma hman tura a tih a ni a, Mizoramah pawh UD&PA department-in kohhran tina chhiar chhuah tur thuchah buatsaihin chumi atan chuan MKHC hi an ngen a ni.
MKHC hruaitute chuan thuchah chhiar chhuah hi tihhlawhtlin an duh thu an sawi a, mahse Cleanliness Drive hi Chawlhni ni lo ni dang remchangah neih ni se tiin an ngen.
Chief minister chuan MKHC ngenna a ngaih pawimawh thu leh tihhlawhtlin ngei tha a tih thuin a lo chhang a, Nationwide Cleanliness Drive hman tum hun October ni 1, chu Kristianten Pathian kan biakna ni, kan ni serh pawimawh tak a nih avangin he Cleanliness Drive hi Mizoramah chuan Pathianni-ah hmang lova a tuk Thawhtannia hman zawk chu a remtihpui thu MKHC hruaitute hi a lo hrilh a ni.