MLA 5-ten dan bawh- chhiat an nemnghet – MNF

Kumin inthlana ZPM ticket-a din tum independent MLA 5-ten banna an thehluh avangin dan an bawhchhe char char tih anmahni ngeiin an nemnghet tih MNF chuan an sawi
MNF Media & Publicity general secretary VL Krosshnehzova chuan India danpui 10th Schedule chuan mipui aiawha thlanchhuah MLA/MP ten a thlangtu mipui laka an rinawmna tur leh an awmna party/pawl atanga an zuan sawn lohna tur dan, Anti Defection Law a nei a. 2018 inthlana Zoram People Movement tih hminga pawl dingten independent-a nomination an file thu sawiin, an zinga mi 7 chu bial 8-ah thlantlin an ni tih a sawi.
Political party an ni lo, tia mipui hnena an inzawrh hnuah mipui uire sanin, Election Commission-ah an in register a. Independent MLA Lalduhoma, Vanlalhlana, C Lalsawivunga, Dr Vanlalthlana, Lalchhuanthanga leh VL Zaithanzama te chu ZPM party tan theihtawp chhuaha tan an khawh avangin dan an bawhchhia tih sawiin, Lalduhoma MLA atanga ban a nih hnuah thudik tantu MNF MLA-te chu a chhe thei ang berin ZPM chuan an chuk zui a, MLA panga pawhin dan palzutin ZPM MLA ang maiin an khawsa zui char char tih a sawi bawk.
“Hamthatna an chuh theih zawng zawng an hmanral hnuah, an nihna dik tak an zep theih tawh lo a, an nihna puang chhuakin party candidate an nih theihna turin 2023 October 10 khan an MLA nihna an bansan ta a. Huaisen taka dan tana ding MNF MLA 12 te dinna chu thudik a nih zia leh dan bawhchhetu zawk chu khatih laia independent MLA 5-te banna thehlut ve ta hian a pholang chiang hle,” VL Korsshnehzova hian a ti.
Dik leh tha bera insawi chung a, dan bawhchhia independent MLA bang ta te leh an party, an insawi loh anga awm thin laka fimkhur turin mipui an chah tih a sawi bawk