MLA Cup U-15 hockey champion Electric North leh Lungleng

MLA Cup U-15 hockey champion
Electric North leh Lungleng
Nimin khan Hnahthialah MLA Cup Under-15 hockey tournament khelh zawh niin, hmeichhe lamah Electric North GSA an champion a,mipa lamah Lungleng Veng GSA an thiam ber ve thung.
March ni 18-26, 2025 chhung awh Hnahthiala khelh zawh tak hockey tournament hi Hnahthial District Hockey Association (HDHA) buatsaih niin, hmeichhia leh mipa team champion hian cup leh pawisa fai Rs. 5,000 ve ve dawngin, runner up team pahnih kutah tangka fai Rs. 3,000 ve ve lutin, top scorer pahnihin cup leh pawisa an dawng bawk.
Electric North GSA
7-0 Lungleng GSA
Hmeichhe final-ah inhnehna nasa tak a thleng a; Electric North Veng tleirawlte chuan pool match-a sili faia an sawp tawh Lungleng Veng tleirawlte lakah a hma aia hnehna nasa zawk an sualchhuak a, Lungleng GSA-in pool match-a an chak loh phuba final-ah an la zo lo!
Electric North GSA tan Emmy Rotluangpuii, Esther Lalrawngbawli leh Lalremruatite’n goal hnih diat an thun laiin Esther Lalpekhlui’n goal khat a thawh ve bawk.
Hmeichhe inelnaa top scorer Esther Lalrawngbawli d/o C. Lalrinzuala chuan tournament chhungin goal riat a vaw lut tling.
Lungleng GSA
3-0 Model SC
Hockey uar leh tuipui khua Hnahthialah pawh hockey game chawinungtu veng langsar pakhat Lungleng GSA rawltharte hian an hmeichhiate ang lo takin pool match-a 2-1-a an ngam loh an veng thenawm Model rawltharte lakah come-back ropui lantirin. mipa under – 15 final-ah sithum faiin Model Sporting Club an hnehlet a, rinkai lo zawk ni chungin champion lallukhum an hlawhchhuak.
Mipa final hi inkhel hmuhnawm tak niin, mipui thawm a tha a, umpire whistle ri hriat har khawpin khelmual sira entute’n thawm an chhuah!
Inkhel inhneh tawk tak ni mah se Lungleng star player leh mipa top scorer ni zui ta Emmanuel Lalduhawma s/o FK Lalzarzova chuan a hun tha hmuh a bawhpelh duh lo a, final-a Lungleng GSA chakna goal thum hlu zet hi a vuakluh vek niin, tournament chhungin goal ruk a puitlin hman.
He naupang ball la tur tlan thiamzia leh insiamrem thiamzia hian sawi a hlawh a, final entute mit titlaitu pakhat a tling.
|an phat atanga a tawp thleng rata team pahnih innawrtawn reng karah Model Sporting Club player-te an inrem dik hlei thei lo a, pool match ngaihtuahin insiamrem an harsat a, an chance neih an hmangtangkai hlei thei lo bawk a; chuti chungin inkhel hmuhnawm tak mipuite an hlui thei tho a ni.
Final pahnih thlirna
Hmeichhe team an inthlau deuh a; mipa team inkhel a hmuhnawmin, fans authawm a ring a, hei hian Hnahthial leh a chhehvela hockey boruak daih tak tak theih lohzia a lantir chiang hle a ni.
Mizoram sawrkar atanga hockey khelmual tha nei mai tur Hnahthial hockey player naupang rualte hian tournament chhung ringawt pawhin hmasawnna tam tak an chhar tih loh theih a ni lo a, tournament hlawhtling tak a nih thu a buatsaihtute’n an sawi.
Under-15 hockey tournament pual hian North II VC Ground cheithat niin, Hnahthial District Hockey Association, Hnahthial North II VC leh ABCI Infrastructures Pvt. Ltd.-te thawhhona rah chu mawi takin a parchhuak zel a ni.
Mipui hlut hlawh tournament final a hmuna chhimtu langsar PC Lalrinpuii, junior international player ei tling chho mek chuan hmeichhe top scorer l awmman a hlan bakah Lalremruati nen umpire-ah an tang nghal bawk.
Engnge an sawi?
Nimin Hnahthiala tournament kharna inkhawm kaihruaitu HDHA secretary C. Lalremsanga chuan MLA Cup tournament hawngtu leh khuallian ni bawk Lalremsiami’n Mizo mipuite thinlunga ngaihhlut a hlawh chu lawmawm a tih thu sawiin, hawnna inkhawma Remsiami’n hlawhtling turin mi bik nih a ngai lo, miin tumna tak tak a neih chuan hlawhtlinna hi mi zawng zawng ban phak a ni tih thu a sawi khan naupangte rilru a hneh hle niin a sawi.
Lalremsanga chuan hockey chu kalphung felfai tak nei, training centre-a indahlut thin an nih avangin hlawhtlin a awl bik thu a sawi a; U-15 hockey tournament puala Hnahthial North II VC Ground cheithat a ni chu lawmawm a ti a, North-II VC leh ABCI-te thawhhona rah a nih thu sawi chungin tournament buatsaihsaktu bialtu MLA Jeje Lalpekhlua chungah lawmthu a sawi bawk.
HDHA vice president H. Lalthanzuala pawhin kharna hunah hian Hnahthial leh a chhehvel khuate’n Mizoram hockey tana an thawhhlawk thu sawi chungin naupangte chu Hnahthial leh Mizoram hming chawisang zel turin a fuih a; Hnahthiala Grass Root Training Centre-ah tournament a tel zawng zawngte in enroll vek turin a chah nghal bawk.
Tournament kharna huna khuallian leh District Child Protection Officer ni bawk R. Lalramdinmawii chuan HDHA-in hockey lama tui naupangte tana hetiang inelna buatsaih a ni chu lawmawm a tih thu sawiin, naupangte chuan eng kawngah pawh tihduhdahna an tawk a nih chuan National Helpline No. 1098-ah report thin tur leh naupang tanpui ngaite pui turin Child Welfare Committee, First Class Magistrate Bench thuneihna nei chu a din thu kalkhawmte a hrilh.