MLA Hostel thlanga thei zuarten insawn tura hriattirna an zawm lo
MLA Hostel thlanga thei zuarten
insawn tura hriattirna an zawm lo
MLA Hostel Khatla building sakthat tum mekah building hlui thiah hnu ah a sakna hmun tur laih a ngaih avangin a thlanga thei zuar 11 chu thuneituten insuanchhuak a, AMC Multi-Complex Tuikual South building-a awm turin tum hnih huntiam pek an nih hnu ah pawh January 28 thleng khan an la zawm lo tih sawi a ni.
Aizawl Municipal Corporation hotute sawi danin, MLA Hostel Khatla building sakthat turah building hlui thiah niin, sak thatna tur laih a ngai a, helai hmuna thut hi mihring tan a him loh avangin state sawrkar leh AMC chuan kawngpui sira thei zuar mi 11 chu loh theih lohin AMC Multi-Complex Tuikual South building-ah insuan turin an ti a. Kumin January 16 hmaa an awmna tur thar ruahman sakah lut tura tih an nih hnu ah an zawm loh avangin January 23 khan show cause notice pek an ni a, Nilaini – January 28 thleng kha chuan an la thu tih thu dawn a ni.
Aizawl khawpui hmasawnna tura state sawrkar leh AMC hmalakna thlawp zel turin a sawm tih AMC chuan sawiin, chutihrualin a dodal zawng leh hnathawh tibuai zawnga awm lo turin an inbeisei tih a sawi a; thu awih taka insawn chhuak turin thei zuarte chu a duh hle tih a sawi a ni.
MLA Hostel Khatla thlanga thei zuarte awm tan dan nia AMC-in a sawi:
8 Helai hmun hi parking area thin a ni a, thei zuarte hmakhua ngaiin thei zawrhna hmun atana hman turin 2019 December 3-ah AMC leh Thei Zuar Association-in inremna an ziak a, 2022 May 19-ah ziak nawnin 2023 June 30 thleng thut phalsak an ni. A hnu zela an thut dan tur chu AMC-in ruahmanna a siam anga kal tura inrem a ni.
8 AMC-in vawi tam a ngaihtuah hnuah parking hmun atana ruahman thin chu titawpin, 2024 September 12 khan Street Vending Zone atan a puan a ni a. Tun thlengin la kalpui zelin vendor 11 an thu mek.
8 Helai hmuna vendor-te sawn tura tihna lehkha hi under secretary (GA), Mizoram Legislative Assembly hnen atangin 2024 September 6 khan AMC chuan UD&PA department kaltlangin a dawng a; a sawnna hmun dang remchang a awm loh thu UD&PA department-ah 2024 September 18 khan hriattir a ni.
8 2025 September 24 -ah CE PWD atanga street vendor thutna hmuna MLA Hostel building an sak dawn avanga vendor-te thutna hmun sawn tura ngenna lehkha dawn chu Aizawl mayor, executive corporators leh PWD nen sawiho a ni.
8 2025 December 5-a House Committee Mizoram Legislative Assembly leh UD&PA department, AMC leh PWD official-ten MLA Hostel Khatla sak thar tur chungchang an sawiho hnuah helai hmuna thei zuarte sawn chhuak tura lehkha dawn bawhzuiin, 2026 January 6 khan Thei Zuar Association president hnenah hriattirna pek a ni a, January 16 ralhmaa AMC Multicomplex Tuikual South, 3rd floor (seat no 17 to 16 & 41) ah insawn tura hriattirna pek an ni.
8 Thei zuartute an la in sawn loh avangin January 23 khan show cause notice pek an ni a. Revenue office bula thut an dilna chu AMC Executive Council-in a ngaihtuah a, AMC-in ruahmanna a lo siam tawh chu kaltlangpui turin a nemnghet. An dilna chu phalsak an nih loh thu leh AMC Multicomplex Tuikual South-a insawn chhuak tura hriattirna lehkha chu Theizuar Association president hnenah January 23 khan pek nawn a ni.