MLA inthlana ding tur 4 ‘Lalpa Chhiahhlawh’ puang

Kumin MLA inthlanpuia ‘Lalpa Chhiahhlawh Intelkhawm’ tih hming hmatheha hmanga ding tur candidate pali puan an ni a. June thla ral hma in MLA bial dang zawnga ding tur puan leh hman an tum.
Zoram Thar hminga hma la thin Rev Dr Zaichhawna Hlawndo kaihhruaia hmalakna, ‘Lalpa Chhiahhlawh Intelkhawm’ tihte hian Nilaini zan khan an hming hmatheha MLA inthlana ding tur ‘hmahruaitu’ mi pali an puang a. Heng mi pali hi ‘sawrkar tana Thuthlung Bawm zawntu turte’ tih an ni a. Heng mi palite leh an dinna tur Assembly bial chu: RevDr Zaichhawna Hlawndo – Hrangturzo, Lalruatfeli Hlawndo – Aizawl North-I, Upa K Lalrimawia – Thorang, Tual Upa ZD Dengngura – Lunglei South te an ni.
‘Pathian lal ram sawrkar tana ding tur Lalpa Chhiahhlawh Intelkhawmte puanna leh hlanna hi April thla hun remchang hmasa berah neih leh tur a ni a. June thla ralhmain mi 40-te hi puanfel hman beisei tih thu an sawi,’ an pawl thuchhuak chuan a ti.
Zoram Thar hruaitu Rev. Dr. Zaichhawna Hlawndo chuan Pathianin a pianna ramah missionary tura kir tura a tih chhan ber, rorelna siamthat chu a taka a din ngei a beisei thu leh Lalpa Chhiahhlawh tura mi inpe ngam an awm chu lawmawm a tih thu a sawi a. Ram leh hnam tluchhe mek tungdinga siamtha turin theihtawp kan chhuah zel dawn a ni a ti bawk.