MLA zingah office of profit dan kalh an awm – PC party

People’s Conference party chuan MLA ho zingah office of profit dan kalh an awm tih sawiin, an chunga dan anga hma lak a nih theih nan political party tinte hma lakpui turin ziakin an ngen.
Zirtawpni khan PC president Vanlalruata chuan hemi chungchang hi thuthar thehdarhtute hnenah a sawi a. India ramah MP (Rajya Sabha leh Lok Sabha-a member) te, MLC (Member of Legislative Council) leh MLA (Member of Legislative Assembly) ho an hlawh leh hamthatna bak thil dang, minister nih leh Parliament (Prevention of Disqualification) Act 1959 in a phalsak bak, India sawrkar emaw state sawrkar emaw atanga neih a khap tih a sawi a. MP-te hi Constitution Article 102 hmanga khap beh niin MLC leh MLA te hi Article 191 hmanga khap beh an ni. Hei vang hian MP, MLC leh MLA engemawzat chu ban (disqualified) an lo ni tawh tih a sawi a ni.
“RTI hmang leh theih ang anga zirchianna atangin, tuna Mizoram MLA zingah heng dan hi bawhchhia an awm mek a. Hei hi dan bawhchhiatna a nih bakah mipui duh loh zawng, hun kal zel atana ram leh hnam tana tha lo ni ah kan ngai. He thil tha lo hi tihtawp kan duh a. Political party tinin hetiang thil tha lo hi kan duh loh vek kan rin avangin hemi chungchanga hma lak pui atan hian Mizorama party awm mekte kan sawm a. Kan ram leh hnam tan hma kan lak ho theih kan beiseiin kan duh a ni,” Vanlalruata hian a ti.
Office of Profit leh India Constitution:
# Article 102 – MP ten, minister nihna bak Parliament-in dan a siam hmanga an chelh theih bak office an luah thei lo.
# Article 191- MLC leh MLA ten, minister nihna bak The Parliament (Prevention of Disqualification) Act 1959-a first schedule ami leh state sawrkarin dan hmanga a phalsak bak office an chelh thei lo.
# The Parliament (Prevention of Disqualification) Act 1959-in a huam tel – Leader of the Opposition, Opposition Group leader adt.