MLS club bawkin coach atan Phil Neville an ruai leh

Kumin June thlaa Major League Soccer club Inter Miami-in an boss nihna atanga an ban hnuah England leh Man-chester United defender hlui Phil Neville chu hna nei loin a han tei lawp lawp a, Thawhtanni khan MLS club ve bawk Portland Timbers chuan an mana-ger atan an senglut a, kum 2026 thleng daih tur contract an ziahpui.
Neville unau hriat hlawh zinga a naupang zawk Phil hian kum 2013 khan Everton thuam hlip chungin a professional football zinkawng a zawh tawp a, coaching lamah a lut zui ta a ni.
Kum 46 mi chuan a club thara chona a hma-chhawn tur chuan a tiphur hle tih sawi chungin a staff thar turte a hmuh vawikhatna atangin a khawsakna thar tur chu a club tur tak, amah leh a chhungkaw tana inhmeh thlap khawpui a nih thu leh a vanneihna enchhin tura hmun dik a nih thu a sawichhuak.
Kum 2018-a England women’s boss a nih lai khan hmeichhiate laka ‘comment’ a pek danah Phile Neville hian mi thin a lo tiur tawh a, ngaih-dam dil hial ngai khawpin an chukrawn nghe nghe a nih kha!
Khami tuma hmei-chhiate thliarhranna tawngkam (sexist state-ment) a cheh a vang khan hawtu a la nei ta reng a; tunhnaia MLS club nen sawizawm a nih lai, manager atana an puan hma lawk khan Portland Timbers fan group pakhat Timbers Army Supporters group chuan tunhma lama twitter-a a thu post avangin Neville nena sawizawm a nih chu an lawm loh thu an tar-chhuak nghe nghe.
Dodaltu boruakah Neville hian manager atana lakluh a nih rualin fans thlawpna a ngen nghal a, fans chu a luhna football club tana bung pawimawh ber an nih thu sawiin, an puihna leh phurpuina chuan nasa takin kawngro a su dawn tih a sawi.
MLS club dang Mia-mi enkawl tura US lama a liam hma kum 2018 atanga 2021 chhung khan Neville hian kum thum chhung coach niin Lionesses (England hmeichhe team) a hrual a, chumi hnuin club lamah a insawrbing zui ta zel a ni.
Manchester United leh England tana a khelh laia a team-mate thin David Beckham-a neitu nihna Inter Miami kha game 13 a khelhpui chhungin vawi 10 a chaklohpui a, Eastern Conference-ah a mawngphah nihpuiin, a thianpa pawh chuan a chhan zo ta lo a ni!