MLS larna belhchhahtu tur Messi

MLS larna belhchhahtu tur Messi
Barcelona leh Paris St Germain tlarhma lama a khelhpui thin Neymar Junior khan United States lama inpu liam ta a team-mate hlui Lionel Messi chungchang a sawi-chhuak a, Argentine an kawl tak avangin Major League Soccer (MLS) larna a pung hluai dawn niin a sawi.
Brazilian striker hian MLS club Inter Miami-a Messi kal tur a hriat lawk thu leh Argentine avanga US top flight-in ngaihven a hlawh lehzual tur thu Pathianni khan ESPN Brazil a hrilh.
Karliamta Nilaini khan kum 35 mi Messi hian tunthla tawpa a PSG contract zawh ruala inremna thar ziah a tum loh thu leh French cham-pion chhuahsana South Beach lama a talent kawl pempui a tum thu van-tlang hriatah a nemnghet a; Saudi Arabia club lamin sum tam zawk nena an sawmna a hnawl thu a tarlang tel.
David Beckham tela superstar uaithla lamte kalna langsar MLS-a Argentina captain inpu liam ve ta chuan he league hi a chawikang dawrh dawn tih Neymar chuan sawiin, “Messi hi ka thian tha berte zinga pakhat a ni a, ani nena kan intawng leh kan kheldun thei te, thian nghet taka kan insiam theite hi football-in thil thlawnpek min pek zinga mi a ni.
“Miami a pan dawn tih ka hriat khan chu khawpuiah chuan a hlim em em dawn tih ka hrilh a, an nunphung leh hawiher avang pawhin Miami lama inkhelhna hun remchang neih chu a chhenfakawm dawn tih ka hrilhlawk a ni.
“Leo vangin United States league hi a inthlakdanglam hlawk dawn tih ka sawi ngam a, tunhma aiin a lar sawt ngeiin ka ring a, mi zawng zawngin a inkhel lei hmuh an tum dawn a, a chhan pawh engkim hian tawp hun a neih vek avangin an kawtkaia ani inkhel en hlimpui hi an duh theuh ngei ang,” a ti.
Brazil international hian tunhnai khan Florida-ah Zirtawpnia NBA Finals Game 4 khel tur basketball player Jimmy Butler a tlawh a, ani nen pawh hian America leilunga Messi khawsa tur chungchang an sawidun!
NBA All-Star zinga vawiruk hming lang tawh Butler pawh hi Messi Inter Miami thuam inbel tur chuan a lo tiphur ve ngang mai a, Argentine World Cup champion chuan US soccer-ah thil tha tam tak a luhpui dawn niin a sawi ve bawk.
Karliamta khan amah bawrtu reporter rual hnenah Butler chuan Messi insawn tur chungchang sawiin, “Tunah chuan he lam a lo hawi ta a, khawvel puma football fans zawng zawng hi a rawn hruailuh ka ring a, mi tin mai hian a inkhel lai hmuhna hun remchang an melh khawp ang. He hmun a rawn thlang hian min tihlim takzet a ni,” tiin.