MNF-in AAI inremna a ziahpui lo – MNF vice president

MNF-in AAI inremna a ziahpui lo
– MNF vice president
Lengpui Airport inhlanchhawng chungchangah MNF sawrkar laiin Airport Authority of India chu eng inremna mah an ziahpui lo a, duhdan erawh an thlen tih MNF hruaitu Lalchhandama Ralte chuan a sawi.
Thawhtannia Mizo Hnam Run-a inkhawmah MNF Legislature Party leader ni bawk Lalchhandama Ralte chuan February 8-a MNF Legislature Party-in Lengpui Airport an tlawhnaah Mizoram sawrkara GAD hotute be hmasa in, airport an tlawh hunah official lo awm se, an tih angin an hriat duh an zawt a. Sawrkar official zingah hian Kamrul-a a lo awm ve thu leh ZPM sawrkarah a tlaktlum viau an rin thu a sawi.
Lengpui Airport chu kan ram rohlu a nih avangin ZPM sawrkarin midang kutah hlan tum mah se, ram mipui, NGO leh midangten an duh loh thu an aupui tawh hnuah sawrkarin chhuanlam fahrah te te siama midang kuta hlan a tum tlat a nih chuan a tawp thlengin an do dawn tih a sawi a ni.
ZPM-in MNF sawrkar chu AAI nen inremna nei niawm a an sawi chu chhangin, AAI hian MNF sawrkarah Lengpui Airport kalpui an duhdan chu an thlen ngei a, mah se, MNF sawrkar chuan eng agreement mah a ziahpui lo tih a sawi.
VC leh LC inthlan neih hma chhanah ZPM minister pathum sawi dan a inang lo theuh a, an ni bakah ZPM spokesman thusawi a dang leh bawk tih MNF MLA hian a sawi a. ZPM sawrkar chu buhfai, oil, stamp duty leh thildang man tisang an nih piahlamah tunah tui man tih san an tum leh nia hriat a nih bakah ruihhlo ngai enkawlna Jordan Centre pawh tihral an tum nia an hriat thu sawiin, hengte hian mipui tawrhna a thlen avangin mipuiin VC leh LC-ah an ZPM candidate an vote loh phah a ring tih a sawi a ni.