MNF leh MPCC-in CBI ko lut tura ngenna an thehlut

MNF leh MPCC-in CBI ko
lut tura ngenna an thehlut
Lengpui-a Indian Air Force tana ram lei tum danah thil dik lo leh dan bawhchhiatna a awm nia ngaih a nih avangin Ningani khan MNF party leh Congress party chuan a hrang ve ve in CBI chhuitir tura ngenna an thehlut.
MNF party aiawhin MNF Legal Board vice chairman Lalpianfela Chawngthu chuan, Lengpui Land Scam-ah Mizoram sawrkar hotute an inhnamhnawih ngei nia an ngaih avangin CBI chhuitir tura ngenna chief vigilance officer, chief secretary Khilli Ram Meena hnenah a thehlut.
MNF Legal Board hruaitu chuan, IAF hnena ram hralh kawnga dan bawhchhiatna thleng leh cheng vaibelchhe 188 vel tih chingpen chu state sawrkar thunun theih loh CBI chhuitir a tul an ti a. Mizoram sawrkarin state pum chu CBI thuneihna huamchhungah puang zuai mah se, a sut leh a; sawrkar laipui hnuaia thawkte chauh chhui phalsak an ni a, Mizoram sawrkar hnuaia thawkte chhui tur chuan sawrkar phalna lak hmasak zel ngaia dahlet a nih avangin, CBI chhuitir tura hma la nghal theitu chu Mizoram sawrkar a ni a, sawrkar inkaihhruaina ding laiah Vigilance Department chu CBI hnena thubuai pe theitu a nih avangin, ngenna hi CVO hnena thehluh a ni tih a sawi.
ZPM Media Committee chairman hminga CBI-a FIR thehluh tumna awm chu tlanchhe chunga mipui bum tumna bawk a ni tih Lalpianfela Chawngthu hian a sawi a. Sawrkar kalphung pangngai awm sa (proper channel) hmang ngam loa, ruling party Media Committee chairman hminga FIR thehluh chu thil kalphung a ni lo, tiin, CBI chhuitir tumna aiin politics thila hmai phihfai tumna mai a ni tih mi a nileng lo tan chuan a chiang nghal vek tih a sawi.
“ZPM sawrkar hian kan lehkha thehluh hi bawhzuiin, proper channel ngeia CBI kuta a hlan kan beisei,” a ti.
MPCC pawhin Aizawl Unit CBI-ah DIG & Head of Branch,CBI/ACB Imphal address-in MPCC Action Committee secretary Lalhmachhuana leh MPCC general secretary C Dothansanga hmingin Lengpui leh Sihphira IAF hnena ram lei leh hralh dan fello awm nia an hriatah CBI hnenah chhui turin FIR an thehlut.
ZPM sawrkarin he ram lei chungchangah CBI chhuitir ngei an phut angin, CBI hnenah general consent pe turin sawrkar an ngen nghal tih an sawi a ni.
Council of Ministers-in he ram lei dan chhui tura CBO kohluh an rel chu vanduaithlak a tih thu MPCC thuchhuah chuan sawiin, ‘Sawrkarin Anti Corruption Bureau-ah police chhuanawm tak tak a nei reng chungin, an ni ring zo loa CBI kohluh a ngai an tihnaah hian Home minister enkawl Home department chungah rinna an nghat zo lo em ni,’ tiin a zawt. Mizoram sawrkar hian a duh a nih chuan ACB kaltlangin heng ram lei leh hralhnaa sulsutu bera ngaih Henry Lalremsanga Hlawnmual mantang eitute an awm a nih chuan a chhuichhuak thei tih a sawi a ni.
‘Hetiang thil chhuichian ngai ti hnuhnawh leh tur siin, eng vangin nge heng ram hi hmanhmawh taka IAF-in a acquire theih tura hmanhmawh taka hma la nge an nih tih kan zawt a. ZPM sawrkar hi a intiam ang ngeiin February thla ralhma ngeiin CBI hnenah general consent pe turin kan phut a ni,’ a ti.