MNF leh ZPM an danglam lo tih mipuiin an hmufiah tawh – Dr Lalmalsawma

MNF leh ZPM an danglam lo
tih mipuiin an hmufiah tawh
– Dr Lalmalsawma
MNF sawrkar kalta leh ZPM sawrkar kan hrawn mekah hian danglamna a awm lo tih mipuiin an hmufiah chho viau tawh tih Congress hruaitu Dr Lalmalsawma Nghaka chuan a sawi.
Ningania Dampa East Block khaw thenkhat a tlawhnaa party hruaitute nen an inkawmnaah MPCC treasurer Dr Lalmalsawma chuan, MNF hun chhung zawng khan bumin kan awm a, an hotupain mumang ramah min hruai a, SEDP min tiam a, engmah min pek leh si loh avangin MNF chu mipui tan rin an har tawh tih a sawi.
ZPM sawrkar pawhin hun reilote chhungin mipui beisei an pha lo tih a lang nia sawiin, inthlan hmaa an intiam angin an awm loh zia a lang chho mek a, kuthnathawktute leh mi nawlpui tan beidawnna a thleng tih a sawi bawk.
MNF sawrkar kalta leh ZPM sawrkar kan hrawn mekah hian danglamna a awm lo tih mipuiin an hmufiah chho tih MPCC treasurer hian sawiin, “Hei vang hian Congress party-in kan ram mipui rawngbawl sak leh turin nasa takin hma kan la a. Kan hna hmasa ber tur chu Mizoram sum dinhmun siamthat leh a, miharsa zawk leh kuthnathawktute, kan hmeichhiate leh thalai rual dinhmun chawikan a ni. Chumi atan chuan policy kan hrualmum chho mek a ni,” a ti.
ZPM chu anmahni khalhngil tura thahnemngai taka beitute an vau nasa a, case siamsak an ching niin Dr Lalmalsawma hian a sawi bawk. Hei hi BJP Modi mize dik tak a ni tih a sawi a. Chuti mai maia vauzam chi an ni loa, ZPM chuan ruling power-in mipui an vauzam zo tawh loa, thudik a lal zel anga, an mualpho zel dawn tih a sawi a ni.