MNF president-in chhiatna hmun tlawh

MNF president Zoramthanga chuan Nilaini khan Cyclone Remal vanga chhiatna thlenna hmun thenkhat a tlawh a, vanduaina tawkte a tawrhpui thu sawiin, chhanchhuah hna thawktute chhuanawm a tih thu a sawi.
Chhiatna tuar nasa ber, Melthum leh Hlimena leiminna hmun a tlawhnaah Zoramthanga hian nunna chan ta te thinlung taka a sun thu leh hliam tuarte an dam leh thuai a duhsak thu a sawi a. Leiminin an in leh lo leh an lirthei leh thil hlu dang a tih chhiatsakte pawh a tawrhpui tih a sawi.
“Cyclone Remal vanga Zoram dung leh vanga chhiatna tuartute MNF party chuan thinlung takin a tawrhpui a, tih theih kan neih apiangah theihtawp chhuahpui zel kan tum a ni,” a ti.
Khaw chhe hnuaia mahni nunna thapa chhanchhuah hna thawktu, Mizo tlangval rualte inpekna chu chhuanawm a tih thu leh, chhiatna kara Mizo nun zemawi lo lang chhuak zel chu thil ropui tak a nih thu MNF hruaitu hian a sawi a ni.
MNF president leh amah tawiawmtu MLA Er. Rohmingliana te chuan Central YMA bultuma chhanchhuah hna thawktuten a tul apianga an hman turin sumfai leh mithi tuamna puan Central YMA hruaitute kutah an hlan a ni.