MNF worker-te thu thehdarh duh danin an party timualpho – ZPM Thalai

MNF worker-te thu thehdarh
duh danin an party timualpho
– ZPM Thalai
Assam Rifles insawnchhuahna tur chungchanga thangthat lak tum luata MNF party worker-ten thu thehdarh duh dan chuan an party a tihmingchhe zawkah an ngai tih ZPM Thalai chuan an sawi.
ZPM Thalai Hqrs. thuchhuak chuan, Union Home minister Amit Shah leh Mizoram chief minister Pu Lalduhoma hriatpuinaa Assam Rifles ram luah leh map-te Mizoram sawrkar kuta hlan chhawn a ni ta hi lawmawm a tih rualin, hemi chungchanga thudik tawk lo thehdarh a ni chu pawi a tih thu a sawi.
Chief minister Pu Lalduhoma kaihhruai Mizoram sawrkar GAD leh Assam Rifles-in memorandum of agreement-a effective date an siam, 2025 April 1 hmaa Union Home minister ngeiin Assam Rifles ram inhlanna hun a rawn tihlawhtling leh ta zel hian, ZPM sawrkar rintlak zia pawh a tichiang hle tih a sawi bawk.
2024 October-a New Delhi-a Mizoram GAD leh Assam Rifles lamin MoA an ziah laiin hriatpuitu zingah MNF MLA leh BJP MLA-te pawh an awm ve reng laiin, MNF party worker-ten ram inhlanchhawn chungchangah mipui, kohhran, NGO, party sawrkar mek leh sawrkar tawhte hmalakna sawiboin, anmahni party bil hmalakna kal zel hlawhtlinna nia an thehdarh duh tih ZPM Thalai hian an sawi a. MNF chu an infak duh luatah khaw eng an hmu zo lo nia an ngai thu a sawi.
‘MNF MLA ten Pu Lalduhoma kaihhruaia GAD leh Assam Rifles-in MoA an ziah an hriatpui hnuah pawh MNF party worker-ten thudik tawk lo an la vawrhdarh duh hian MNF party a tihmingchhe hle ah kan ngai,’ ZPM Thalai thuchhuah hian a ti.
Assam Rifles ram luah sawn chhuak tur hian kum 38 hma lak a ni tawh tih sawiin, ‘Tuna hlawhtlinna leh hmasawnna kan chan mek hi political party hrang hrang, sawrkar tawhte hmalakna leh NGO, kohhran leh Zoram mipuiin inlungrual taka ke kan pen hona rah a ni tih kan hria a. Tuna hlawhtlinna kan chan hi Zoram mipui hlawhtlinnaah kan ngai a ni,’ a ti.