MNF/ ZPM candidate kan vote chuan BJP kan vote – Lalnunmawia Chuaungo

MP inthlan turah MNF emaw ZPM candidate emaw kan vote chuan BJP kan vote tihna a ni tih Congress vice president Lalnunmawia Chuaungo chuan a sawi.
Champhaia thuthar thehdarhtute a kawmnaah MPCC vice president chuan, tunhma atanga BJP auhla, Hindu ho hip nana an hman pathum a awm tih sawiin, pakhatnaah chuan Jammu & Kashmir-in India Constitution-a inhungbikna an neih Article 370 nuaibo sak; pahnihnaah Ayodhya Muslim ho mosque – Babri Masjid, kum 1991-a LK Advani hoa an tihchhiat hmunah Hindu temple sak; pathumnaah chuan India rama Uniform Civil Code hman tih te a ni tih a sawi.
“UCC-a an target ber chu Muslim leh Kristiante kan ni. Sakhua in tihdan hrang kan neihte, hnam tenau ten hnam dan kan neihte, kan culture-te hi tha an ti loa, Hindu ho tih dan min hmantira min sengluh vek an tum avangin UCC hi kan hmang ang an ti a ni,” a ti.
MNF nen thawhho tumin an inbia a, BJP kaihhruai NDA an chhuahsan theih loh avangin an thawkho thei ta lo a. CAB an pass pui ang tho khan an ti leh anga, BJP tichaktu tur an ni dawn tih Lalnunmawia Chuaungo hian a sawi. ZPM pawh tuna an CM voice call leak out atang khan BJP an awn tih a hriat a, nikum maiah pawh Siahaah helaia BJP kalkanin central-ah an thawkho tho dawn tih a lo sawi tawh tih a sawi a ni.
Tunah pawh ZPM candidate chuan MNF candidate ang thoin issue based-in BJP pek an tum thu a sawi a ni, tiin, “Central-a BJP tichak tura thawktute an ni. MNF emaw ZPM candidate emaw in vote chuan BJP in vote tihna a ni a. Kohhran rawngbawlna leh Chanchintha hrilh hna pawh thawk thei lo ila a pawi kan ti lo tihna a ni. Congress candidate Pu Lalbiakzama kan vote chuan India ram hmun hrang hranga zau zawka rawng kan bawl theihna kawng hawngtu atana beiseina awmchhun a ni a, Pathian rawngbawlna atana ke kan pen ve na a ni ang,” a ti.
Chawngte (C) leh Tlabunga a campaign-naah Congress MP candidate Lalbiakzama chuan, central-a BJP rorel dan a thlirin an rorelna do tura ke a pen chhuak lo a nih chuan nakin zelah kan tu leh faten min la dem dawn nia a hriat avangin BJP do turin politics ah a zuanglut tih a sawi.
“Awm chum a, ke per chungin BJP hi an che ngai lo a, an che buan buan ngai lo. Fing tak leh thiam takin an che chho a. Hei hi Mizo Kristiante hian kan hriatthiam a ngai. Kum tam taka ruahmanna an neih tawh chu tunah hian an tihlawhtling chho mek a. Hmanni lawkah Ayodhia ah Ram temple sain Uniform Civil Code pawh BJP an sawrkar leh a nih chuan kan hman a rinawm tawh. Manipur-ah nasa takin BJP sawrkar vangin kan unauten an tuar a, mahse Prime minister a ngawi hmak,” a ti. Congress kaihhruai INDIA Bloc a sawrkar chuan Manipur-a kan unaute buaina leh harsatna hi an chingfel dawn tih a sawi a ni.