MNF/ZPM vote chuan BJP kan vote tihna a ni – Secular Alliance

MLA inthlanah MNF emaw ZPM emaw vote chuan sakhaw zalenna paih tumtu BJP kan vote tihna a ni tih Mizoram Secular Alliance chuan an sawi.
Congress party, PC party leh ZNP telna Mizoram Secular Alliance (MSA) convener John Siamkunga chuan, MLA inthlanpui awm turah sakhua a himna tur leh sakhaw zalenna a awm chhunzawm zel theih nan Congress candidate zawng zawng vote turin mipui a ngen tih sawiin, “India-ah political party lian pahnih an awm a, pakhat zawk BJP chuan Hindu lal ram din tumin a bei char char a; pakhat zawk Congress party chuan sakhaw zalenna tungding turin a bei ngar ngar thung,” a ti. BJP leh a thawhpui MNF leh ZPM vote chuan BJP kan vote tihna a nih thu leh sakhaw zalenna bo mah se pawi kan ti lo tihna a nih dawn thu a sawi.
Hindu lalram din tumtu BJP chuan Mizoram mite ngei hmanruaa hmangin sawrkarna lak a tum nia sawiin, sum hmangin sawrkarna lei a tum a, tunhnaia inthlang tur state 5 zinga 3 tal la turin thih thain an bei mek tih a sawi.
BJP hian Lok Sabha-a MP a ngahna hmangin sakhaw zalenna, secularism chu paih thei mah se, chumi tipuitling tur chuan state pathuma sawrkarna lak belh an ngai tih MSA convener hian sawiin, “Tuna a lam tang state 11 nen, 3 a neih belh chuan a duh a tipuitling thei tawh dawn a, chumi a tih theih chuan sakhaw zalenna hi a bo hlen tawh dawn. Sakhaw zalenna an nuai bo hnuah UCC an hmang zui anga, Hindu tihdanin engkim tih a ngai tawh ang,” a ti.