Mobile tower leh cancer inzawm loh dan uar zawka inhrilh darh an rawt

Mobile tower leh cancer inzawm loh
dan uar zawka inhrilh darh an rawt
Information & Communication Technology department leh telecom service provider (TSP) leh veng thenkhata local council inhmukhawm chuan mobile tower leh cancer inzawm loh dan uar zawka mipui hrilhhriat nise an ti.
ICT department leh TSP leh Chaltlang, Durtlang, Kulikawn, Bethlehem, Ramthar, Tuikhuahtlang, Bethlehem Vengthlang local council thutkhawmah chief informatics officer Dr Lalthlamuana chuan tunlaiah lei leh hralh, fee leh bill pek, sawrkar dawr leh a dangte mobile kaltlanga tih a ni tawh a. Hei vang hian mitinin mobile signal tha kan neih theih department-in a duh a, TSP pawh theihtawpin an service tichak turin a nawr reng tih a sawi. Mobile signal tha tur chuan mobile tower neih tam a ngai a, TSP-ten tower dahna tur an van thin bakah thenawm khawveng atanga harsatna a awm thin avangin mobile tower /pole dahna tur hmun a vang thin tih a sawi a ni.
Tuten emaw mobile tower-in cancer natna a thlen thei ti a, finfiahna tak tak awm loa an sawi thin avangin mipui tam tak a ti chiai thin tih a sawi a. Heng thu belhchiandawl lo hi ringlo turin mipui a chah tih a sawi.
“World Health Organization (WHO) leh organization rintlak tak takte pawhin research tam tak an bei tawh a, a inlaichinna an la hmu lo. India ramah hian Sap ramte ai daihin mobile tower siam danah hian an khauh zawk a, chu bakah Telecom Regulatory Authority of India (TRAI) hian mobile tower-te hi a khat tawkin an endik ve reng thin,” Dr Lalthlamuana hian a ti.
Mobile tower leh radiation chungchanga hriat dan dik tawh lo siamtha tur leh kan hriatchian zawk theihna turin mithiamte nen sawiho leh hrilh zau nise tih a ni bawk.