Mocha thlipui vangin in 280 chuang chhia

Chawlhnia thlipui tleh, mocha cyclone vangin Mizoramah in 280 chuang a chhia a, chung zingah chuan biak in pawh a tel.
Disaster Management & Rehabilitation department-in Thawtanni tlai dar 5 thlenga an chhinchhiah danin, Mizoramah mocha thlipui hian in 30 chu luah tlak loh khawpin (fully damage) a nuai chhia a, a then lai a tihchhiat in 123, a tihchhiat viau (severly damage) in 129 a awm. A vai hian in 288 a ni.
Luah tlak loh khawpa chhia hi Siaha district-ah in 23 a awm a, Lunglei district-ah in pali, Lawngtlai district-ah in pahnih, Saitual district-ah in pakhat a awm.
Thlipui vanga in chhiain a nghawng hi mi 6195 tiin an chhinchhiah a, an zingah hian raltlan an tel. Lunglei district-ah refugee camp pahniha awm mi 131 a nghawng a, Siaha district-ah refugee camp pahniha mi 141, Lawngtlai district-a refugee camp pathuma awm mi 396, Hnahthial district-a refugee camp pakhata awm mi 40 te’n thlipui hi an tuar tiin an chhinchhiah.
Biak in a tihchhiatah New Siaha-a ECM biak in chu chhe viau ‘severely damage’-ah an dah a, he biak in hi a ceiling a chhia a ni. |haizawlah Baptist Kohhran biak in leh Saunday School Hall te a tichhe bawk.
Thli vanga in chhiaah hian sorkar in leh hmunhma te pawh a tel a, sikul tihchhiat te pawh a nei.
State Meteorological Centre lam chuan Mizoram hi mocha thlipui kalkawng a ni lo tih an sawi a, Mizoram chhim lam chu a kawng atangin a hnai deuh a, chuvangin hmun dang aiin chhim lamah thli hi a na tih an sawi. ‘He thlipui hian Mizoram chhim lam a nuai ve hlek,’ an ti.
India Meteorological Department atanga thu an dawn danin, Bay of Bengal tuipui atanga thlipui insiam mocha hi a zuih ral tan a, Thawhtanni tukah khan thlipui tawp lam (depression) a ni tawh. A na lo telh telh ang a, a tawp mai ang tih a ni.
Disaster Management & Rehabilitation minister Lalchamliana chuan ‘Cyclone Mocha’ thawkah hian Mizoramah mi 4619 velin an tuar a, heng tuartute chhawmdawlna tur hi district tinah sum dah lawk vek a ni, tiin, District Disaster Management Committee-ten buaina awm loin hma an la vek turah an ngai tih a sawi a ni.