Mock Drill neih dan hi…

Chhiatna a lo thlen thulha hmachhawn/chet lak dan tur enchhinna (Mock Drill) chu nimin khan Mizoram hmun hrang hrangah neih a ni a. Mock Drill neih zawh a nih hian, thlirletna hun neih nghal a ni a, district hrang hranga mock drill neih chu a hlawhtlingin tluang taka neih a nih thu report a ni hlawm a.
Aizawlah chuan Mock Drill neihna hi Vaivakawn leh Zohnuai inkarah niin, chhiatna thleng hi ‘leimin’ a ni. Mock Drill neih hma hian, Mock Drill neihna tur hmun (Zohnuai peng atanga Ropaibawk inkar) chu tlawhpawh theih loha darkar thum chhung kawng khar (road block) a ni a, road block a nih tur thu hi a hma ni atangin sawrkar chuan Public Notice a lo chhuah lawk tawh nghe nghe a ni.
Mock Drill neihna tura inbuatsaihna hi chu a tluang sa em em a, a hlawhtling ang tih a rinawm a. Mipui lam pawhin an hriatlawk thil a ni a, lei minna tur hmun pawh hriatlawk diam a ni a, mipui tlawhpawh theih loh tura duansa thlap a nih avangin Mock Drill nei turte pawhin dipdaltu nei lovin an tihtur an ti zar zar thei dawn tih pawh a lang chiang sa ruak awm e. Hetiang khawpa chhiatna lo thleng tur hriatlawk sa diam leh mipui thunun beh sa vek hnuaiah hi chuan, a hlawhtlingin a tluang lo thei lo. Mock Drill nei turte chet velna dal thei tur kawng dungah lirthei leh bungrua dah phal a ni lo bawk a, a lo dah lui an awm chuan, Section 179 MV(Amendment Act, 2019 hmanga hrem theih a nih thu lah sawrkar lamin a chhuah lawk diam bawk si.
Chuvangin, mock drill hi chu a tibahlahtu em em awm lovin a tluang purh lo thei lo a, a hlawhtling tih loh theih pawh a ni lovang chu.
Chutih rual chuan, chhiatna tur hmun hriatlawk loh, chhiatna thlen hun tur pawh hriatlawk loh hi kan hmachhawn tur chu a ni miau mai si a, tuna mock drill kan kalpui danah hian, ‘a tluang’ ‘a thlawhtling’ kan tih ang hi a tak tak a lo thlen hunah hian hlawhtling taka kalpui (practise) theih a ni ang em? tih hi a pawimawh lai tak chu niin a lang.
Chuvangin, a tak tak ang thei tur ang bera mock drill hi kan kalpui thin a pawimawh dawn hle. Entir nan: Mock drill-a tel tur (participants) te chauhvin a hun (date) an hria ang a, a darkar leh a hmun erawh hrelawk bik lovin, siren a rik hunah khawi hmunah nge chhiatna thleng tih inzawt chhuak chawpin, chhiatna thlenna hmun an panna kawnga harsatna an tawh dan leh, a hmuna chetlakna an kalpui laia harsatna thleng theite chiang takin a lo lang mai dawn a, chutiang harsatna sutkian dan tur chu mock drill atanga zir chhuah tur niawm tak a ni. Tuna kan mock drill neih dan hi chu, “Drama chan tur uluk taka zirlawk hnua zalen taka stage-a show neih” nen inanna a nei awm e.