Modi-a tlawh hma lawkin Chhatishgarh-ah hel 50 inpe

Modi-a tlawh hma lawkin Chhatishgarh-ah hel 50 inpe
Prime Minister Narendra Modi-a’n a tlawh hma lawkin Naxalite 50 chu thuneitute hnenah Pathianni khan an inpe a. An zinga 14 hi an luman belhkhawm pawh Rs. nuai 68 zet a tling.
Helho hi Chhattisgarh-a Bijapur district-ah an inpe tih police thuneituin a sawi a. State police leh Central Reserve Police Force (CRPF) hotu liante hmaah an ralthuamte an tung a ni.
“Maoist ngaihdan thawrawng leh mihring nihphung lo tak te, chu an duh lo tih an sawi a, dan pawna awm Communist Party of India (Maoist)-a an hotu lian zawkten tribal an tihduhdah dan te leh an pawl chhunga inmil lohna awmte avangin an inpe a. Venhim hna thawktuten an awmna hnaih taka camp an siam te, ‘Niya Nellanar’ (your good village) scheme hmanga sipaite leh thuneituten hmun kilkhawr zawka awmte ni tin mamawh an pek that chuan a rilru a hmin hle bawk a ni tih an sawi a ni,” tiin Bijapur Senior Superintendent of Police Jitendra Kumar Yadav chuan a sawi.
“Mi 50 inpete zinga mi paruk hi an luman pawh Rs nuai 8 theuh chhiar an ni a, mi pathumin Rs nuai 5 theuh luman an nei bawk a. Pangain Rs nuai 1 theuh luman an nei bawk,” a ti.
“District Reserve Guard (DRG), Bastar Fighters, Special Task Force (STF), CRPF leh an sipai tha bik, CoBRA (Commando Battalion for Resolute Action) chu heng helho inpek theih nan hian an thawk rim hle a ni,” tiin Yadav-a chuan a sawi bawk.
SP chuan Naxalite hel inpete hi sorkarin policy a neih angin hel pawl chhuahsana nun pangngaia nung tura an inpek avangin chhawmdawl leh kaihruai zui an ni dawn tih a sawi.
Helho inpek hi Prime Minister Modi-a’n a tlawh hma lawkah a ni a. Modi-a hian Rs. vaibelchhe 33,700 chuang zet senna tur ram chhung leh an state tihhmasawnna tur thil siam leh sak tur lung a phum dawn a ni.
Hetih lai hian venhim hna thawktute hian Inrinni khan Naxal 18 an that a, an zinga 11 cghu hmeichhia an ni nghe nghe.
Heng helho hi Bastar region an tih chhunga Chhattisgarh-a Sukma leh Bijapur district-a hmun hniha beihpui an thlaknaah an thah an ni a. March 31, 2026 atanga Naxal awm tawh lohna ram din tura sorkar hmalakna hlawhtlinna ropui tak a nih thu sorkar chuan a puang.
Inrinnia hlawhtlinna chan nen hian kuminah Chhatisgarh-ah hian Naxalite 134 kah hlum an ni tawh a, Bastar division bikah hian 118 thah an ni.
Police-in an chhinchhiah dan chuan kum 2024 khan Bastar region-ah hian Naxalite 792 an inpe a, he region hian district pasarih a huam a ni.