Modi-a’n Ditwah vanga buai Sri Lanka puih a inhuam

Modi-a’n Ditwah vanga buai Sri Lanka puih a inhuam
Prime Minister Narendra Modi-a chuan Cyclone Ditwah avanga chhiatna nasa tak an tawh mek laiin Sri Lankan President Anura Kumara Dissanayake-a chu biain chhawmdawl hna an thawh mekah theih ang tawka puih a inhuam thu a hrilh.
Telephone-a Thawhtannia an inbiaknaah Modi-a hian Sri Lanka-a thihna leh chhiatna a thleng nasa chu a tawrhpui thu a hrilh a. India-a mipuite chuan thlawp tlat a, an thenawm thliarkar ramin an mamawh hunah an tlanchhe dawn lo tih a sawi.
President Dissanayake-a pawhin hun harsa tak an tawh laia India-in a pui chu a lawm tak zet tih a sawi a, rang taka rescue team leh chhawmdawlna hmanrua an pe nghal chu a fak tak zet tih a sawi niin sorkar thuchhuahah tar lan a ni.
Dissanayake-a hian Sri Lanka mipuite pawh a hun taka India a che chhuak chu an lawm tak zet tih Modi-a hi a hrilh bawk.
“Prime minister chuan President Dissanayake-a hi mi mangangte chhanchhuah leh chhawmdawl hna thawh mek, Operation Sagar Bandhu-ah Sri Lanka chu a pui zel dawn tih a hrilh a ni,” tiin thuchhuahah hian tar lan a ni.
Modi-a hian Dissanayake-a hnenah hian India-in Vision MAHASAGAR a neih mek leh ‘First Responder’ nihna a chelhah nakin zela Sri Lanka-in chhawmdawlna, vantlang mamawh pek leh theihna tura hma a lakna, a tuartute khawsakna chawi kan lehna tura chetnaah India chuan a thlawp ze dawn tih a hrilh a ni.
Hruaitu pahnihte hian a tul ang zela inbiak zui zel ni se an ti bawk.
Cyclone Ditwah hian kar hmasa khan Sri Lanka hmun thenkhat nuaiin chhungkaw 316,366-a mi 11,51,776 velin an tuar a. Thawhtanni thim hlim thleng khan ruah sur nasa avanga tui lian leh lei min avangin mi 366 thi awm tawhin chin hriat loh mi 367 an la awm mek bawk.