Modi-a’n Israel tlawh dawn, Netanyahu-a’n a thian tha a ti

Modi-a’n Israel tlawh dawn, Netanyahu-a’n a thian tha a ti
Prime Minister Narendra Modi-a’n Nilaini atanga Israel a tlawh hma lawkin Israeli Prime Minister Benjamin Netanyahu-a chuan, “Mi mal taka a thian tha,” a nih thu leh ram pahnihte hian eibar, inpalaina leh ram venhimna lam an thawh dunna an tichak dawn tih a sawi.
Modi-a hian Israel hi February 25-26 chhung a tlawh dawn a ni.
X-ah Netanyahu-a chuan ‘mi mal taka inthian tha’ an nih thu hi tar langin phone pawhin an inbe fo va, an intlawh tawn ve ve tawh tih a tar lang.
Netanyahu-a hian India a lo tlawh tawh thu leh Modi-a pawhin Israel a tlawh tawh thu a tar lang a. “Mediterranean kan dai kai dun a, hemi hnu atang hian Mediterranean, Ganges leh Jordan-ah tui tam tak a luang lut tawh a ni,” a ti.
Israeli president hian Prime Minister Modi-a hian an ram thlengin Knesset (Israeli Parliament)-ah thu a sawi dawn tih a tar lang a. “Hetah hian in awm ve vek dawn tih ka chiang,” a ti.
Prime Minister Modi-a’n Israel a tlawh chhung hian Netanyahu-a chuan an ramin high-tech, AI leh quantum computing-ah thawh dunna tur an lo dap dawn tih a sawi.
“AI leh quantum hi kan hmabak a nih avanga sawi ka ni lo va, tuna kan awm mekna a ni tawh zawk. Hemi lama khawvela a hmahruaitu ram zinga mi nih kan duh a ni,” a ti.
Prime Minister Modi-a pawhin Israeli prime minister thu tar lante hi chhangin, “Thank you, my friend,” a ti let.
X-ah vek Modi-a chuan, “India leh Israel inkungkaihna nghet tak i sawi hi ka pawm a. India hian Israel nena inthian thatna nghet tak, inrinngamna, thil thar chin chhuah leh remna leh muanna a awm theih nana an inpek dunna hi a chhuang hle a ni,” a ti.
Prime minister hian Israel a tlawh turah pawh hian thil tam tak an sawi dun a beisei thu a tar lang bawk.
Tun tum Modi-a’n Israel a tlawh tur hi a vawi hnih zinna tur niin kum 2017 khan a lo tlawh tawh a, Indian prime minister zinga Israel tlawh hmasa ber a ni nghe nghe.