Modi-a’n thlawhna tlakna hmun tlawh, hliamte a kan

Modi-a’n thlawhna tlakna hmun tlawh, hliamte a kan
Ningani chawhnua Ahmedabad, Gujarat-a Air India thlawhna tlakna hmun chu Zirtawpni khan Indian Prime Minister Narendra Modi chuan tlawhin hliam tuarte damdawi inah a kan nghal.
Tun hnai kum eng emaw zat chhunga India-a thlawhna tla rapthlak ber, Air India Boeing 787-8 Dreamliner tlaah hian mi 242 chuang zingah pakhat chauh dam chhuakin 241 an thi.
A tlakna hmuna a delh medical college-a zirlai panga vel an thi nia sawi a ni a, hliam tuar eng emaw zat an awm bawk.
Prime minister hian Sardar Vallabhbhai Patel Airport thlengin a tlawhna, Meghaninagar a pan nghal a. Gujarat Chief Minister Bhupendra Patel-a leh sorkar mi pawimawh dangten an tawiawm.
Thlawhnaa chuang zinga dam chhuak awm chhun, Indian thlah, British khua leh tui, Vishwash Kumar Ramesh chu damdawi inah a kan zui.
Prime minister a nih hmaa kum 12 zet chief minister a lo ni tawhna, Gujarat-a chhiatna thleng a tlawhnaah hian Modi-a chuan he vanduaina hian a tihrilhhai tak zet tih a sawi.
“Thua sawi fiah mai piah lamin hrehawm ka ti a. He hun khirh takah hian a tuartute zawng zawng ka tawrhpui a. Puih theihna apianga pui turin minister leh thuneituten an awm reng a ni,” tiin Ningani khan X-ah a lo tar lang tawh.
Modi-a hian thlawhna tlakna leh damdawi in a tlawhnaah hian thuthar lakhawmtute a kawm lo va, a hmunhma erawh chpchiar taka fanga a en kual lai video erawh tihchhuah a ni.
Thlawhna tlakna hmun atanga ruang lak chhuah hna chu thawh zawh tawh a ni a; mahse, ruang thenkhat chu a kan chhiat nasat em avangin tute nge an nih hriat mai a harsa a, DNA sample laka finfiah tuma beih chhunzawm nghal a ni.
Dam chhuak awm chhun, Ramesh-a hi seat 11A-a thu a ni a, ‘a dam chhuah theih dan hi a inhre bik lo’ niin a unaupain a lo sawi tawh.
Mi thiamte chuan Air India thlawhna tlaa mi pakhat chauh a dam chhuak hi mak an ti hle a. Tum danga thlawhna chesualah chuan dam chhuak tam tak an awm a, thenkhatah tam tak an thi a, tun tuma mi tam tak kara pakhat a dam chhuak bik hi thil thleng danglam tak niin an ngai.
Boeing 787-8 Dreamliner tlak chhan hi hriat theih a la ni lo va, chhuituten chhui hna thawk zui mekin a black box pahnihte pawh zawn mek zel a ni a. An hmuh hunah chuan an chetsual dawn laia thil thleng eng emaw zat hriat theih an inbeisei.
Tar lan tawh angin thlawhna hi London Gatwick tumhmun pan turin Ahmedabad-a Sardar Vallabhbhai Patel International Airport atanga chhuak niin a thlawk chhuah hnu lawkah a tla nghal a. A tlakna hi BJ Medical College residential quarters awmna lai niin thlawhna hian a tui a phurh hnem avangin a kang nghal a, nasa takin a alh leh a khu pawh a inphuh chhuak tih video darhah a hmuh theih.
Ahmedabad-a Air Traffic Control chuan an thlawh chhuah chiah khan pilot chuan harsatna an neih nghal thu a hrilh tih a sawi.
Mi thiamte chuan video darh atanga a lan dan chuan a khawlpui (engine) pahnihah chiang lo a awm ni thei a, savain a su pawh a ni thei tih an sawi.
Directorate General of Civil Aviation (DGCA) chuan a khalhtu, Captain Sumeet Sabharwal kha tawnhriat nei tha tak niin thlawhna darkar 8,200 a khalh tawh niin an sawi a. First officer Clive Kundar-a pawh darkar 1,100 tawnhriat lo nei tawh niin an sawi bawk.
Air India chuan passenger-te kha Indian 169, British 53, Portuguese pasarih leh Canadian pakhat an ni tih a sawi.